KOVALIMA, 22 Janeiru 2026, (TATOLI)- Prezidente Autoridade Munisípiu Kovalima, Miguel Armada Cardoso, konvida lia na’in sira husi postu administrativu hitu hodi rona sira-nia ideia kona-bá hakerek istória Kovalima.
PAM Kovalima halo konsultasaun no diskusaun ho lia-na’in sira hodi deside mapa munisípiu Kovalima, hakerek istória no evolusaun governasaun lokál, estabelesimentu administrasaun governu lokál no símbolu munisípiu.
“Ohin, ita rona ita boot sira (lia-na’in) nia hanoin kona-bá hakerek istória Kovalima no oinsá deside símbolu Kovalima. Razaun rona lia nian sira-nia hanoin kona-bá istoria kovalima nune’e bele hakerek livru “, Prezidente Autoridade Munisípiu Kovalima, Miguel Armanda Cardoso, hato’o liuhusi diskursu iha salaun AMC, ohin.
Biban ne’e, Autoridade Kovalima fó hanoin ba lia-na’in sira atu kumpre regra nune’e prosesu durante konta istória presiza rona malu, nune’e labele hamosu dezentendimentu.
Tuir istória evolusaun Governasaun lokál Covalima ho etimolojikamente mai husi liafuan tetun terik “Koba no Lima”. Koba signifika dadebuk ka fatin ne’ebé hodi tau malus, bua, ahu no tabako, enkuantu Lima refere ba liurai oan na’in lima: Reinu Fohorem (Nutetuk), Reinu Tialai Taroman (Fatululik), Reinu Fatumea, Reinu Wehali (Belu), no Loro Suai.
Husi aspetu ukun na’in sira nian ka autoridade tradisionál sira nian, maibé autoridade portugés sira muda naran Koba ba fali Cova tuir versaun portugés, hosi naran orijen Koba Lima ba “Covalima”, naran ida ne’e mak eziste to’o ohin loron.
Funsaun Koba tradisionalmente uza iha serimónia rituál sira hanesan : koremetan, fetosan-umane, han-uma been, saubatar, tara-bandu no seluseluk tan. Maibé reinu Mape Zumalai no Reinu Maucatar submete ba reguladu Ai-Assa Bobonaru.
Notisia relevante:Xanana husu ba Komité 12 Novembru hakerek livru kona-ba manifestasaun juventude sira-nian
Jornalista: Celestina Teles
Editór: Florencio Miranda Ximenes
