DILI, 27 Janeiru 2026 (TATOLI)—Konsellu Ministru, tersa ne’e, aprova projetu Rezolusaun Governu ne’ebé aprezenta hosi Ministru Prezidénsia Konsellu Ministru, Agio Pereira no Sekretáriu Estadu Komunikasaun Sosiál, Expedito Dias Ximenes, ne’ebé determina ezonerasaun ba atuál Prezidente Konsellu Administrasaun Rádiu no Televizaun Timor-Leste, EP (RTTL, EP), Elizeu Isaac Fernandes.
Iha reuniaun Konsellu Ministru ne’e mós Governu deside nnomeia Rosário da Graça Maia hodi asume kargu nu’udar Prezidente Konsellu Administrasaun foun ba empreza publika radiodifuzaun ne’e nian ho mandatu tinan haat (4).
Notísia Relevante: Lidera TATOLI ‘Onra’ Boot Ba Rosário
Nomeasaun ne’e prodús efeitu hahú iha 01 Fevereiru 2026 no bazeia ba imparsialidade, integridade, kapasidade téknika no jestaun Prezidente foun nian no mós ninia esperiénsia profisionál no senioridade ne’ebé hetan rekoñesimentu.
Sekretáriu Estadu Komunikasaun Sosiál, Expedito Dias Ximenes, hateten ohin reuniaun Konsellu Ministru define iha ajenda ka proposta lima no husi proposta lima ne’e inklui mós halo aprovasaun ba rezolusaun kona-ba ezonerasaun Prezidente Konsellu Administrasaun RTTL, E.P nian, Elizeu Isaac Fernandes.
“Hanesan ha’u ko’alia tiha ona Prezidente atuál Elizeu Isaac Fernandes hetan nomeasaun husi Konsellu Ministru kuazé tinan ida liu no bainhira nia asume knaar ne’e iha dekretu-lei nú. 42/2008 maa regula nia hodi halo tuir no define ona iha dekretu-lei refere,” Sekretáriu Estadu Komunikasaun Sosiál, Expedito Dias Ximenes, informa ba jornalista sira iha nia kna’ar fatin, Palásiu Governu, ohin.
Maibé, nia dehan, iha prosesu servisu dalaruma nia haluha no ladun konsiente entaun nia deforma formál hodi hola parte hanesan Vise I Sekretáriu Ezekutivu Organizasaun Juventude partidu CNRT nian.
Nune’e, haree ba dekretu lei ne’e rasik liuliu iha artigu 13° alina B hateten katak labele sai membru konsellu administrasaun ida ne’ebé sai fali dirijente ba partidu polítiku, signifika katak bainhiar viola artigu 13° mak ita bele dehan nia inkompatibilidade.
“Tanba ne’e mak tuir kompeténsia ne’ebé iha SEKOMS hanesan membru Governu ne’ebé responsabiliza iha área komunikasaun sosiál no RTTL, E.P tutelada iha SEKOMS, mak ohin sira aprezenta proposta rezolusaun Governu nian ba iha Konsellu Ministru,” nia esplika.
Tanba ne’e, nia dehan, nomeasaun Prezidente foun sei simu pose no hala’o kna’ar bainhira rezolusaun ne’e públika ona iha Jornál Repúblika, entaun prosesu la’o hanesan baibain no konserteza iha situasaun ida-ne’e bainhira seidauk iha responsável foun entaun responsável tuan sei kontinua hala’o nia kna’ar.
Biográfia Prezidente RTTL, E,P, Rosario da Graça Maia
Rosario da Graça Maia, agora daudaun ho tinan-49, Estadu Sivíl Kaben Nain, Moris iha Lete- Foho, Ermera, 10 Outubru 1977.
Tinan 2010 akaba Lisensiadu Relasaun Internasionál husi Universidade da Paz (UNPAZ) iha Fakuldade Siénsia Sosiál no Umaniora, maibé antes ne’e, iha tinan 1996 to’o 1999 tur mós iha banku eskola ba Fakuldade Agrikultura (Agribusiness) Universidade Udayana Denpasar Bali–Indonézia (La ramata tanba referendu 1999)
Esperiénsia Profisionál-Organizasaun iha tinan 1996, Rosario da Graça Maia, sai mós membru ba organizasaun massa estudante RENETIL (Resistencia Nacional dos Estudantes de Timor-Leste)-Uner Aitana, Bali.
Tinan 1997, Journalist Bulletin Loriku Lian (Bulletin RENETIL), 1999–2001, UNTAET Language Assistant, 2001–2002 Jornalista Radio UNTAET, 2001 Jornalista Rádiu Timor-Leste no Membru Asosiasaun Jornalista Timor Lorosa’e (AJTL).
Iha tinan, 2002–2013, nia asume kargu hanesan Xefe Seksaun Notísia Distritu Rádiu Timor-Leste. Iha 2003-2006, nia nu’udár Xefe Departamentu Programasaun-Rádiu Timor-Leste no iha 2005-2007 sai Xefe Divizaun Relasaun Internasionál iha AJTL.
Períodu 2006 to’o 2007 Media Alerts Stringer (SEAPA–South East Asia Press Alliance), 2005-2006–Diretór Programasaun no Edukasaun Komunitária Rádiu Televizaun Timor-Leste (RTTL), 2006-2009–Diretór Rádiu Timor-Leste.
Nune’e mós sai Diretór Programasaun Rádiu Televizaun Timor-Leste, Empreza Publika (RTTL, E.P) iha tinan 2010 to’o 2012, no tinan 2013-2014 sai Asesór ba Projetu Meiu Komunikasaun Sosiál iha Sekretaria Estadu Komunikasaun Sosiál (SEKOMS).
Nia asume kna’ar nu’udar Espesialista Mídia ba Embaixada Estadu Unidu Amerika (EUA) iha Dili, Timor-Leste.
Iha parte kapasitasaun ba an rasik, Rosario Maia hahú iha tinan 1995 hodi tuir English Language Training International– ELTI iha Yogyakarta, tinan hanesan mós aprende kona-bá Computer Course (Microsoft Word,Excel and Power Point) iha Yogyakarta.
Iha 2001 – Basic Journalism Training – Radio UNTAET, Cool Edit Training – Radio UNTAET. Tinan 2003 Radio and TV Management and Programing design–AIBD, Malaysia, 2003 Radio and TV Management Training–Radio 68H Jakarta–Indonézia, 2004 International News Coverage training –Understanding European Union, Melbourne –IPJC, Australia, 2005 TV News production and presentation Training – Hanoi, Vietnam (Vietnam Television- VTV), 2006 Leadership Training–RTP, RTTL, Dili, 2006 – Media Alerts Training – SEAPA, Tailándia, 2007 – Media Law training for Broadcasters and Journalist, AIBD–Malázia.
Iha 2007–Understanding the United Nations–Fredrick Ebert Stiftung-FES New York, USA, 2008 – Australian Leadership Award -Managing Newsroom in post conflict situation–IPJC–Melbourne Australia, 2009–Enhancing Journalism for Democratic Governance in Emerging Democracies in Asia UNESCO (Bangkok, Tailándia), 2010–The strategic of Media in Crisis Management –The U.S. Pacific Center for Security Studies (Jakarta, Indonesia).
Iha 2015–Social Media Practitioners Training–U.S. Foreign Service Institute (Bangkok, Tailándia), 2016–Visual Diplomacy: Photo and Video-U.S. Foreign Service Institute (Bangkok, Tailándia, 2017–Website content design and management-U.S. Foreign Service Institute-U.S.International Information Program (IIP), Washington, D.C.
Notísia Relevante: KM Nomeia Rosario Maia Lidera Agênsia TATOLI
Jornalista : Alexandra da Costa
Editór : Cancio Ximenes
