DILI, 30 Janeiru 2026 (TATOLI) – Institutu Apoiu Dezenvolvimentu Emprezariál (IADE) realiza serimónia entrega pakote apoiu Fasilidade Inkubasaun Negósiu (FIN) 2025 ba benefisiáriu na’in-24, hodi promove emprezáriu mikru, pekena no médiu.
Manán-na’in sira ne’e mai husi munisípiu Ainaru, Aileu, Baukau, Dili, Ermera, Lautein, Likisá, Kovalima, Manufahi, Manatutu, no Vikeke.
Diretór-Ezekutivu IADE, Filomeno Marcelino Belo, hateten manán na’in sira ne’e aprezenta sira-nia proposta ba FIN iha Janeiru 2025 no molok sira hetan apoiu husi IADE, liuhusi faze avaliasaun lubuk ida ne’ebé rigór, tanba hahú husi selesaun dokumentu, halo avaliasaun, prepara planu orsamentu no seluk tan.
“Ita-nia benefisiáriu na’in-24 ne’ebé simu pakote apoiu Fasilidade Inkubasaun Negósiu kompostu husi feto neen no mane 18. Pakote ne’ebé ita fó apoiu ho montante osan boot liu hahú husi $12.300 no ki’ik liu $3.300. Orsamentu ne’e maihusi fundu transferénsia públika 2025 nian”, Filomeno Marcelino Belo informa, ohin.
Benefisiáriu sira ne’e halo ideia negósiu ne’ebé diferente hanesan haki’ak fahi, prodús viveiru, habokur karau, haki’ak manu broiler, prodús sakola, ai-moruk tradisionál, haki’ak ikan, no seluk tan. “Ba oin ita-nia tékniku sira akompaña nafatin halo asisténsia téknika ba sira-nia atividade durante tinan rua, bainhira sira bele la’o mesak ona mak ita foin husik sira”, dehan.
Ministru Koordenadór Asuntu Ekonómiku, Francisco Kalbuadi Lay, elojia joven feto no mane barak ne’ebé nakonu ho ideia kriativa, liuhusi atividade negósiu oioin ne’ebé nakonu ho esperansa ba futuru.
Nia dehan IADE iha papél importante iha nasaun no hanesan instituisaun ida ne’ebé fó apoiu ba emprezáriu nasionál mikro, ki’ik, no médiu sira. IADE mós serbisu besik ho instituisaun relevante sira seluk no parseiru sira hodi tulun emprezáriu sira buras no hetan susesu.
Tuir nia, programa xave ida husi IADE mak Fasilidade Inkubasaun Negósiu ne’e atu dezeña hodi tulun emprezáriu sira ne’ebé iha ideia negósiu ne’ebé viavel, inovadora, no prontu ba merkadu.
“Objetivu prinsipál husi Programa Fasilidade Inkubasaun Negósiu mak atu hametin setór privadu, nune’e bele kontribui liután ba dezenvolvimentu ekonomia nasionál. Programa ida-ne’e mós enkoraja kriasaun produtu no servisu foun sira, neʼebé ajuda diversifika ita-nia ekonomia no hamenus dependénsia ba setór balun de’it”, dehan.
Iha IADE nia Planu Asaun Anuál, pakote FIN kontinua fó apoiu ba emprezáriu potensiál sira ho ideia negósíu ne’ebé inovativu no sustentável. “Ha’u enkoraja benefisiáriu no partisipante sira atu aproveita didi’ak apoiu ne’e. Hahú ho negosiu mikru, aprende pasu ba pasu, no buras beibeik. Ho disiplina, serbisu maka’as, no kriatividade, negósiu ki’ik sira bele sai empreza ne’ebé forte no susesu iha futuru”, nia sujere.
Nia subliña liuhusi Ministériu Koordenador Asuntu Ekonómiku, Governu kontinua fó apoiu tomak ba IADE. Hamutuk, servisu atu identifika joven feto no mane sira ne’ebé iha ideia negósiu inovadór no motivasaun maka’as.
Esforsu ne’e aliña ho Governu nia vizaun no programa ekonómiku. Governu foka ba setór prioridade sira hanesan agrikultura, turizmu, komérsiu, no indústria. Setór sira ne’e iha poténsia boot atu kria empregu, hasa’e rendimentu, no tulun kreximentu ekonómiku ne’ebé sustentavel.
“Ha’u enkoraja ita-boot sira hotu atu kontinua aprende, halo inovasaun, no serbisu hamutuk. Atu ita-boot sira-nia negósiu bele buras no hetan susesu nafatin”, nia hato’o.
Iha fatin hanesan, benefiáriu Ferdinandus da Costa agradese ba IADE ne’ebé apoia sira hahú husi proposta to’o aprezentasaun nivel nasionál kona-ba sira-nia planu negósiu.
“Ho ita boot sira-nia apoiu finanseiru ami bele sosa ekipamentu ne’ebé presiza hodi moderniza no inovasaun ba avidade ne’ebé ami halo. Ho valór orsamentu ne’e la’ós ajuda de’it ami, maibé investimentu ida ne’ebé diretamente ba ami-nia realizasaun mehi ne’ebé durante ne’e ami hakarak atu halo, maibé ami laiha kapasidade finanseira”, nia dehan.
Notísia relevante: IADE nia programa FIN-KPNI, ajuda dezenvolve ona MPME hamutuk 34
Jornalista: Arminda Fonseca
Editora: Maria Auxiliadora
