DILI, 30 Janeiru 2026 (TATOLI) – Institutu Apoiu Dezenvolvimentu Emprezariál (IADE) sei la realiza, durante tinan 2026, Kompetisaun Planu Negósiu Inovadór (KPNI) no pakote apoiu kona-ba Fasilidade Inkubasaun Negósiu (FIN).
Diretór-Ezekutivu Institutu Apoiu Dezenvolvimentu Emprezariál, Filomeno Marcelino Belo, esplika razaun la hala’o programa rua ne’e, tanba hetan redusaun orsamentu iha 2026, liuliu ba atividade rua ne’e.
“Tinan ne’e, ami sente laran-susar tanba orsamentu ne’ebé aloka ba programa Kompetisaun Planu Negósiu Inovadór no programa pakote apoiu Fasilidade Inkubasaun Negósiu ne’e hetan redusaun. Nune’e, tinan ne’e ami labele simu tan proposta foun”, Filomeno Marcelino Belo dehan ba Tatoli, ohin.
Nia subliña katak ho redusaun orsamentu ne’e, IADE sei halo de’it monitorizasaun no akompañamentu ba atividade sira ne’ebé benefisiáriu sira antes ne’e halo ona, no kontinua halo marketing atu apoia sira asesu ba kréditu.
“Orsamentu ne’ebé ita prevee ba halo monitorizasaun no akompañamentu ne’e hamutuk rihun $400-resin, tanba ita sei halo monitorizasaun iha territóriu tomak”, nia informa.
Lembra katak Orsamentu Jerál Estadu 2026 ba IADE hamutuk $949.300, kompara ho tinan kotuk millaun $1-resin, tanba hetan redusaun kuaze rihun $300-resin.
Ho KPNI no FIN ne’ebé IADE halo dezde 2023, IADE apoia ona benefisiáriu hamutuk 244. “Husi benefisiáriu sira ne’e nia atividade to’o agora la’o nafatin, ita mós kontinua halo monitorizasaun ba sira”, konklui.
Notísia relevante: Benefisiáriu 24 simu pakote apoiu FIN 2025 husi IADE
Jornalista: Arminda Fonseca
Editora: Maria Auxiliadora
