OEKUSI, 30 Janeiru 2026 (TATOLI) – Eskola Bázika Sentrál (EBC, sigla portugés) 01 de Maio Palaban Rejiaun Administrativa Espesiál Oekusi Ambeno (RAEOA) hamutuk ho Diresaun Rejionál Edukasaun no Solidariedade Sosiál, kinta ne’e, selebra misa abertura ba anu letivu 2026.
Iha omília, Padre selebrante Padre Parókia Nossa Senhora do Rosário Numbei, Florindo da Conçeição, enkoraja profesór sira atu hala’o kna’ar ho domin tanba profisaun nu’udar vokasaun.
“Ita agradese ba letivu 2025 ne’ebé liu daudaun maske hetan difikuldade oioin, maibé tanba edukasaun mak save fundamentál nasaun nian, tanba ne’e papél manorin sira importante iha rai-ida-ne’e. Husu nafatin badinas hanorin ita-nia oan sira, tanba ita-boot sira misaun hanesan profesór presiza hadomi tanba ne’e vokasaun, tanba eduka ema ida-ne’ebé futuru nasaun nian,” Padre Florindo de Jesus, hateten iha nia omília misa ne’e.
Inan-aman sira mai entrega tomak sira-nia oan iha eskola ida no profesór sira atu forma nia, tanba bainhira labarik barak la asesu eskola, bele sai dezempregu barak iha sosiedade, husi ne’e mak sei aumenta mós problema oioin iha ita-nia rai.
“Ita-nia esperansa mak tenke harohan nafatin ba Aman Maromak, ita ita hetan moris di’ak matenek iha letiva 2026 ne’ebé la’o daudaun. Agradese ba parte edukasaun tanba liuhusi misa ne’e, ita bele fó hanoin ba malu oinsá garante edukasaun ba ema hotu, atu prepara ita-nia rai ba futuru ne’ebé di’ak,” nia hamenu.
Iha biban ne’e, Diretór Edukasaun no Solidariedade Sosiál, Vincêncio Cono, hateten, katak misa agradesimentu ne’e importante ba eskola sira, fó agradese nafatin ba prestasaun serbisu ne’ebé hala’o ona iha tinan kotuk hodi prepara nafatin Espiritu nasionalizmu tinan sira tuirmai.
“Serbisu barak ne’ebé ita halo durante tinan ida tomak, iha susesu no iha dezafiu, maibé ita nafatin agradese ba Maromak, ohin ita hahú letiva foun ba 2026 nian. Ita-nia esparansa mak tenke pontualidade, dixiplina, tanba iha eskola nia save mak dixiplina, tama ho oras, prepara lisaun, elobora pontu no hanorin ho domin, ida-ne’e mak kna’ar profesór nian,” nia hateten.
Notísia relevante:Akadémiku: “Atu hanorin alunu mak presiza iha vokasaun”
Jornalista: Abílio Elo Nini
Editór: Rafael Ximenes de A. Belo
