OEKUSI, 14 Jullu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, rekomenda ba mídia Estatál Agência Noticioza Timor-Leste (TATOLI,I.P) atu kontinua divulga informasaun no tenke sai fonte ofisiál informasaun husi povu ba Estadu, no Governu.
Régio da Cruz hato’o rekomendasaun ne’e relasiona ho selebrasaun aniversáriu da-X (tinan 10) Ajénsia TATOLI (27 Jullu 2016 to’o 27 Jullu 2026), iha Salaun Konvensaun Palaban, Oekusi, ohin.
“Primeiru ha’u hakarak fó agradesimentu ba Ajénsia TATOLI nu’udar Ajénsia midía iha Timor-Leste ho nia serbisu na’in-sira, liliu jornalista sira-ne’ebé hatutan povu nia lian ba Estadu, no Estadu ba povu; kontinua nafatin ita-boot sira-nia kna’ar, ne’ebé saida de’it maka povu ko’alia, Governu no Estadu ko’alia hatutan nafatin. Parabéns ba ita-boot sira, liliu ba TATOLI,I.P, ne’ebé halo anivsersáriu, kontinua krexe no kontinua serbisu ba ita-nia povu, ne’ebé demokrátiku transparente no livre husi izolamentu, kontinua investimentu ba iha kobertura no mós akompaña nafatin nesesidade, dinámiku, ne’ebé halo ita-nia povu sai matenek no halo ita-nia Estadu serbisu nafatin ba povu,” nia hateten.
Kontinua atualiza informasaun saúde
Iha fatin hanesan, Diretora Serbisu Rejionál ba Asuntu Saúde, Odete Amado Martins, hato’o agradese tanba durante kontribui divulga informasaun saúde nian ho povu.
“Nu’udar Autoridade RAEOA, durante ne’e ami observa ita-boot sira-nia serbisu, TATOLI nian di’ak tebes, tanba ita-boot sira ajuda hodi pasa informasaun sira liliu ba atividade saúde nian, ne’ebé ami presiza tebes atu alarga ba to’o iha komunidade sira ho ita-boot sira-nia prezensa. Ami agradese, no sujere kontinua atualiza informasaun sira kona-ba saúde atu nune’e povu bele hatene,” nia orgullu.
Dirijente saúde ne’e, espera katak ho aniversáriu ba tinan-10, ba futuru tenki profisionál nafatin iha modelu públikasaun informasaun ba komunidade sira, nune’e informasaun sira-ne’e bele kredivél no labele fó impaktu negativu ba komunidade sira.
Kobertura neutru no inkluzivu
Iha parte seluk, Diretór Rejionál Serbisu Edukasaun Oekusi, Vincêncio Cono, hato’o nia parabéns ba mídia TATOLI,I.P nu’udar Ajénsia Estadu ba tinan-10 (Dekade ida), no hein katak ba futuru hadi’a di’ak liután.
“Observasaun durante kobertura, husi parte edukasaun apresia tebes, tanba bele fahe informasaun ba to’o iha baze ho aktuál no faktuál, inparsiál, neutru, ne’e ami nia observasaun no durante ne’e mós apoia tebes atividade iha serbisu rejionál edukasaun nian no iha partisipasaun maka’as iha nesesidade sosiál no inkluzaun hodi hatuur no bolu atensaun ba iha rejionál nasionál no mundialmente hanesan ASEAN no CPLP,” nia hateten.
Nu’udar membru Autoridade nia esperansa ba futuru, TATOLI hahú nia pájina foun ba tinan-11, bele sai mós televizaun Ajénsia TATOLI I.P iha Timor-Leste, no halo kobertura prega ba kada postu administrativa sira, nune’e habelár di’akliu tan informasaun bazea ba realiza no situasaun iha rai-laran.
“Ha’u-nia rekomendasaun ba jornalista sira iha TATOLI,I.P, nafatin halo kobertura ba povu tomak, la haree ba kór polítika no rasa, opta nafatin inkluzividade iha kobertura, nune’e bele públika no atualiza ba sosiedade hotu hahú husi baze mai rejionál ba nasionál no internasonál,” nia apela.
Notísia relevante:Ezisténsia tinan 10, Tatoli presiza hametin konfiansa públika no adapta ba era dijitál
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste ne’ebé iha kapasidade elabora produtu informasaun no notísia neʼebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, indepedente, izenta, klareza no nafatin iha integridade no mós kredibilidade.
Jornalista: Abílio Elo Nini
Editór: Rafael Ximenes de A. Belo
