OEKUSI, 03 Fevereiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, akompaña husi Diresaun Rejionál Infraestrutura (DRI), tersa ohin, observa kondisaun estrada iha aldeia Sabén suku Bobometo sub-rejiaun Oésilo hodi reabilita ho tipu emerjénsia.
Hafoin observa direita kondisaun estrada referida, Xefe Aldeia Sabén Abílio Ili, aprezenta preokupasaun katak, durante tinan barak difikulta movimentu transporte sira bainhira tula pasiente ba ospitál inklui difikulta estudante sira asesu ba eskola.
“Suku sira seluk, sira-nia estrada di’ak, hela ami-nia mesak mak seidauk hadi’a. Ami hela besik tan fronteira hatudu imajen ladi’ak, depois ami-nia oan sira ba eskola tenke hakuur tahu barak ne’e, kuandu iha ema ruma moras mós karreta labele asesu tama mai, domingu-domingu dalaruma ami la ba misa tanba igreja iha sorin Oémanu,” nia hateten ba PA RAEOA bainhira observa estrada Sabén, ohin.
Notísia relevante:Xefe suku sira husu Autoridade RAEOA hadi’a estrada ne’ebé estragu
Iha biban ne’e kedas, Prezidente Autoridade RAEOA, Régio da Cruz Salu, afirma, preokupasaun komunidade sira presiza konsidera, tanba ne’e iha tempu-badak Autoridade sei halo desizaun atu reabilita.
“Ha’u hanesan nível polítika ba desizaun, bainhira povu foti nia kestaun beibeik entaun ita tenke intervein lalais. Polítikamente ohin ita mai terrenu atu hatene katak, semana ida-ne’e ba oin, ita tenki hola ona desizaun ruma atu hahú hala’o serbisu,” nia hateten.
Iha fatin hanesan, Diretór Diresaun Rejionál Infraestrutura (DRI), Remígio Nunu Sila, informa, daudaun ne’e iha empreza lokál balu submete ona proposta, tanba ne’e DRI prepara ordén serbisu ho kontratu temporáriu.
“Ita simu ona proposta husi empreza lokál sira, depois tékniku sira mós mai hala’o ona levantamentu ona ho distánsia kilometru 1,8, ne’ebé hein desizaun husi Prezidente Autoridade, depois ami sei esforsa atu atribui orden serbisu ba empreza lokál ida ho kontratu temporáriu, nune’e bele hahú serbisu ho legál ruma, tanba ne’e intervensaun ho emerjénsia,” nia hateten.
Notísia relevante:Xefe Governu orienta ADN no DRI monitoriza projetu estrada Noefefan ba Oénunu
Jornalista: Abílio Elo Nini
Editór: Rafael Ximenes de A. Belo
