DILI, 04 Fevereiru 2026 (TATOLI)–Asosiasaun no Klube Boxe Timor-Leste hamutuk 27 lamenta no husu Konfederasaun Desportiva Timor-Leste (CDTL, sigla portugés) no Ministériu Juventude Desportu Arte no Kultura (MJDAK) atu troka estrutura Federasaun Boxe Amadora Timor-Leste (FBATL) atuál atu salva modalidade Boxe iha Timor-Leste, tanba sira hala’o prátika májestaun.
Portavós Asosiasaun no Klube Boxe Timor-Leste hamutuk 27 iha Timor-Leste, Abilio Orlando dos Santos, hateten sira halo ona petisaun hasoru FBATL tanba iha ona problema boot durante tinan rua (2) ne’eb’e to’o agora seidauk rezolve.
“Ami hatama ona petisaun ba Federasaun Boxe, tanba durante tinan rua (2) ou tolu (3) ona mak Federasaun iha problema ne’ebé boot, sira prátika májestaun boot, halo eventu laiha relatoriu ba Governu. Sepois iha sira-nia mandatu ne’e lori atleta sira ba Xina maibé la konsege tuir kompetisaun no buat barak tan, ita presiza hadi’a ida-ne’e,” bilio Orlando dos Santos, hateten ba jornalista sira iha Jináziu Dili, kuarta ne’e.
Nia dehan, problema ne’ebé akontese iha FBATL ida mós mak jogu SEA Games tinan kotuk iha Tailándia tanba Federasaun utiliza podér hodi hili Boxista ba tuir kompetisaun la’ós Boxista maibé árbitru.
“Problema ida tan mak iha jogu SEA Games ne’e, sira hili atleta la’ós atleta, maibé hili fali árbitru na’in-rua (2) feto mak ba tuir kompetisaun ne’e. Ida-ne’e ha’u haree katak Federasaun halo abuzu podér. Loloos realiza eventu nasionál mak hili atleta sira ba kompete, maibé Federasaun la halo ida-ne’e, depois ita hotu akompaiña rezultadu hatudu la di’ak,” Abilio dehan.
Tanba ne’e, sira-nia parte husu ba Konfederasaun Desportiva Timor-Leste (CDTL, sigla portugés) hamutuk ho Ministériu Juventude Desportu Arte no Kultura (MJDAK) foti desizaun no rezolve problema hirak ne’e.
“Ami husu ba CDTL ne’ebé sai mahon ba federasaun hotu no Governu liuliu MJDAK atu rezolve problema ne’e, oinsa haree atu realiza kongresu ida, tanba Prezidente Federasaun hakotu ona nia peregrinasaun iha mundu ne’e tinan kotuk. Maibé sira hili Prezidente ida troka nonook de’it, agora hakarak ka lakohi tenke halo fali kongresu hili estrutura foun,” nia dehan.
Ho problema ne’ebé iha Asosiasaun no klube 27 hasorumalu ona ho Ministériu Juventude Desportu Arte no Kultura (MJDAK), Nelyo Isaac Sarmento no iha tempu besik buka solusaun ba problema hirak ne’e.
CDTL simu ona informasaun
Iha sorin seluk, Prezidente CDTL Afrânio Xavier Amaral, hateten simu ona informasaun husi Asosiasaun no klube Boxe nian no iha tempu besik sei konvida estrutura FBATL hodi ko’alia buka solusaun ba problema hirak ne’ebé akontese.
“Ami simu ona informasaun husi Asosiasaun no klube Boxe nian, iha tempu besik ami sei bolu estrutura Federasaun hodi ko’alia, oinsá buka solusaun ba problema ne’ebé iha,” Afrânio hateten.
Nia dehan, CDTL mak mahon ba Federasaun desportiva hotu iha Timor-Leste, nune’e sei buka dalan hodi rezolve problema iha FBATL atu nune’e bele prepara atleta sira ho di’ak ba eventu internasionál sira.
“Ami fó hatene ba sira katak, ita tenke rezolve problema sira ne’e ho mekanizmu no estatutu ne’ebé mak FBATL iha. Ami simu informasaun dehan problema lubuk ida, maibé ami labele fó sai ba públiku, sei buka solusaun hodi rezolve problema sira-ne’e,” nia dehan.
FBATL simu ona petisaun
Hatan ba kestaun hirak ne’e, Sekretariu Jerál Federasaun Boxe Amadora Timor-Leste (FBATL) Rogério Mendonça hateten katak Federasaun Boxe Amadora Timor-Leste (FBATL) simu duni ona petisaun husi Asosiasaun no klube Boxe sira iha Timor-Leste.
“Sim! Ami simu duni karta ida husi Asosiasaun no klube sira, maibé ha’u labele fó komentariu klea’n lai. Ami sei bolu malu tuur hamutuk ko’alia oinsá mak ha’u pasa fali informasaun no bolu mídia sira halo konferénsia imprensa,” Rogério hateten ba TATOLI via telefónika.
Jornalista : Hortencio Sanchez
Editór : Cancio Ximenes
