DILI, 04 Fevereiru 2026 (TATOLI)—Governu liuhusi reuniaun Konsellu Ministru aprova projetu Dekretu-Lei neʼebé aprezenta husi Ministra Edukasaun, Dulce de Jesus Soares, kona-ba kurríkulu programa nasionál ekivalénsia ba ensinu sekundáriu.
Ministra Edukasaun (ME), Dulce de Jesus Soares, hateten ohin sira aprezenta proposta-lei ba ensinu sekundáriu ekivalénsia no ohin Dekretu-Lei pasa ona signifika hakat preparasaun kurríkulu.
“Ita espera se ita konsege kompleta iha tinan 2026 ne’e ita sei implementa iha tinan 2027, maibé ida-ne’e ita sei hahú.Pelumenus ita iha mudansa ida ita iha ona Dekretu-Lei ida ba formaliza ona ita-nia ensinu rekorente ba iha kuríkulu nasionál ba ekivalénsia,” Ministra Edukasaun ne’e informa ba jornalista sira iha Palásiu Governu, ohin.
Diploma ida-ne’e estabelese programa nia enkuadramentu kurrikulár, ne’ebé destina ba foinsa’e no adultu sira-ne’ebé la ramata ensinu sekundáriu ho idade neʼebé loloos, nune’e mós asegura dalan alternativu ida ho ekivalénsia formál ba nivel ensinu ida-ne’e.
Kurríkulu ne’e adota abordajen ida-ne’ebé fleksivel no inkluziva, adekuada ba espesifisidade edukasaun foin-sa’e no adultu sira, define organizasaun área formasaun, metodolojia pedagójika, sistema avaliasaun no kondisaun sertifikasaun nian.
Ho medida ida-ne’e, hakarak atu reforsa asesu ba edukasaun durante moris tomak, promove inkluzaun edukativa, sosiál no profisionál nune’e mós kontribui hodi hadi’a kualifikasaun populasaun nian.
Jornalista : Alexandra da Costa
Editór : Cancio Ximenes
