DILI, 11 Fevereiru 2026 (TATOLI)—Konsellu Ministru, kuarta ne’e, liuhusi reuniaun aprova Dekretu-Lei neʼebé aprezenta husi Primeiru-Ministru, Kay Rala Xanana Gusmão, no Ministru Prezidénsia Konsellu Ministru Agio Pereira kona-ba Rejime Karreira Espesiál ba Bombeiru Profisionál Timor-Leste.
Bazeia ba dokumentu ofisiál iha portál Governu define katak ho diploma ida-ne’e, Governu hakarak estabelese estatutu espesífiku ba Bombeiru Profisionál iha Timor-Leste.
Atu rekoñese natureza úniku husi sira-nia funsaun nu’udar ajente espesializadu ba protesaun sivíl no importánsia husi sira-nia papél iha protesaun ba vida umana, no beins nune’e mós hodi responde ba situasaun emerjénsia, asidente no dezastre iha territóriu.
Nune’e rejime ne’ebé propoin ho ninia objetivu atu define Karreira Bombeirus Profisionál hanesan karreira espesiál iha funsaun públika, estabelese ninia estrutura ierárkika, kategoria no pozisaun sira nomós regras ba rekrutamentu, formasaun, progresaun no promosaun.
Tamba ho inisiativa ida-ne’e, Governu buka atu valoriza no dignifika karreira ne’e, asegura estabilidade ne’ebé boo- liu no enkuadramentu profisionál, no reforsa kapasidade atu responde ba sistema nasionál protesaun sivíl.
Jornalista : Alexandra da Costa
Editór : Cancio Ximenes
