VIKEKE, 11 Fevereiru 2026 (TATOLI)—Diretór Servisu Ministériu Agrikultura Peska, Pekuária no Floresta (SMAPPF) Munisípiu Vikeke, Olívio Soares Freitas, informa SMAPPF Munisípiu Vikeke kontinua distribui fini hare époka tinan 2026 ba agrikultór sira.
“Iha tinan ida-ne’e ami kontinua distribui fini hare ba ita-nia agrikultór sira husi Postu Uatulari, Uatukarbau, Ossú, Vikeke Vila no Lakluta ho objetivu atu ajuda agrikultór sira kuda iha sira-nia natar,” Olívio Soares Freitas ba jornalista sira iha resintu Administrasaun Munisípiu Vikeke, Kuarta ne’e.
Diretór SMAPPF Munisípiu Vikeke ne’e esplika fini ba époka 2026 hamutuk tonelada 25 mak daudauk ne’e rai ona iha SMAPPF munisípiu hodi hein distribui ba agrikultór sira.
“Ba époka ida-ne’e ita simu ona fini hare kompostu husi fini hare-mutin no fini hare-uaikana. Husi tonelada 25 ne’e, foin lalais ne’e ita-nia tékniku SMAPPF distribui uluk ona tonelada 15 ba Postu Uatukarbau no Uatulari no distribui tonelada ida (1) bá Postu Ossú. Enkuantu, Postu Lakluta no Vikeke Vila mak ita seidauk distribui tanba natar seidauk halai,” nia relata.
Nia esplika natar ektare ida hetan kilógrama 25, ektare rua kilógrama 50, depende ba natar ninia medida.
“Ba tinan ida-ne’e ita-nia agrikultór sira implementa sistema Pratika Agrikultura Di’ak (PAD) tanba ne’e ma kami distribui fini bazeia ba natar nia medida. Liuhusi fini sira-ne’e ita bele hasa’e produsaun hare,” Olívio tenik.
Jornalista: Vitorino Lopes da Costa
Editór: Xisto Freitas da Piedade
