DILI, 12 Fevereiru 2026 (TATOLI)-Komisaun D ne’ebé Trata Asuntu Ekonomia no Dezenvolvimentu finaliza ona diskusaun proposta lei númeru 19/VI (2a) Konkorrénsia iha faze espesialidade no agora hein diskusaun no aprovasaun iha finál globál.
Prezidente Komisaun D, Ricardo Baptista, hateten Komisaun sei submete relatóriu no pareser proposta lei ne’e bá iha meza Parlamentu Nasionál hodi bele marka ajenda iha plenária atu halo aprovasaun finál globál.
Durante iha espesialidade foku ba diskusaun kada artigu husi deputadu sira no parte Governu bele prodús lei ida atu iha implementasaun iha futuru fó duni benefísiu ba sosiedade.
Proposta lei ne’e iha artigu hamutuk 29. Iha diskusaun deputadu sira aprezenta proposta alterasaun hamutuk ualu ho objetivu atu halo melloramentu ba artigu balun ne’ebé nesesita atu halo mudansa.
Lei Konkorrénsia ne’e mai husi inisiativu Governu nian nu’udar marka importante ida iha sistema legál Timór-Leste nian ho objetivu atu promove kooperasaun Estadu nian iha konstrusaun merkadu kompetitivu, ekuitativu no transparente ne’ebé hametin ekonomia nasionál, promove kooperasaun internasionál no fó benefísiu ba sosiedade tomak, haburas fundasaun ekonómika sustentável, kontinua hadi’a kondisaun moris populasaun nian no hasa’e moris di’ak konsumidór sira.
Notísia relevante: https://tatoli.tl/2026/01/13/parlamentu-aprova-proposta-lei-konkorrensia-iha-jeneralidade/
Jornalista: Nelson de Sousa
Editora: Maria Auxiliadora
