DILI, 23 Fevereiru 2026 (TATOLI)—Formadór husi ABC International Development (ID) Austrália Randi Dahnial, fó formasaun Mobile Journalism (Mojo) ba jornalista no editór sira iha Agência Notisioza Timor-Leste Tatoli, Institutu Públiku (Tatoli, I.P).
Notísia Relevante: Falta rekursu difikulta TATOLI sai “trend-setter no clearing house”
Matéria formasaun ne’e sei foka liu ba tulizasaun Mobile Journalism (Mojo) iha prosesu kobertura, inklui mós matéria formasaun seluk hanesan edisaun vídeo ba sosiál mídia, dezeñu gráfiku no utiliza aplikasaun CANVA.
Prezidente Konsellu Diretivu Agência Notisioza Tatoli, Noémio Mateus Soares Falcão, hateten formasaun ida-ne’e kontinuasaun matéria báziku ba jornalista no editór sira kona-ba Mobile Journalism hodi aumenta jornalista sira-nia kapasidade iha mundu mundu jornalizmu nian.
“Tanba ne’e, ha’u husu ba imi hotu atu aproveita didi’ak ho matéria báziku ne’ebé ita presiza hela iha era agora, liuliu uza aplikasaun sira hodi dezeñu gráfiku no Canva. Nune’e, ha’u hakarak formasaun ne’e hotu ida-idak tenke aplika iha ninia servisu,” Prezidente Agência Tatoli, Noémio Falcão hateten ba partisipante sira bainhira lhalo abertura ba formasaun ne’e iha sala redasaun Tatoli, Faról, ohin.
Nia hatutan, tanba ne’e atu Evita diskute malu iha terrenu no iha servisu fatin, nune’e ritmu servisu la’ós de’it hakerek testu naruk maibé bele mós públika daudaun ona video badak sira-ne’ebé hakerek ho textu (caption) uitoan.
Formadór ABC Austrália, Randi Dahnial, hateten nia servisu iha ABC Darwin durante tinan haat ona ho esperiénsia ne’ebé mak barak iha área oioin iha jornalizmu nian.
“Durante formasaun matéria ne’ebé ha’u sei fornese ba kolega sira iha Tatoli mak kona-ba tékniku foti imajen, aprende kompozisaun objetu, sekuénsia imajen, uza mobile journalism,” nia informa.
Nia dehan, aleinde aprende teória bázika mobile journalism nian, maibé mós sei iha prátika ne’ebé sei fó biban ba jornalista no editór sira prátika direta iha terrenu bazeia ba matéria ne’ebé sira aprende.
Iha oportunidade ne’e, reperzentante jornalista Agência Tatoli, Osória Marques, sente kontente ho formasaun ne’ebé mak fasilita husi ABC Austrália, tanba bele aumenta tan ninia koñesimentu hodi bele aplika iha servisu kobertura loro-loron iha terrenu.
“Loos duni, durante ne’e ha’u hala’o servisu hanesan jornalista testu, maibé liuhusi formasaun ne’e bele promove liután ha’u hodi foti imajen ka vídeo bainhira halo kobertura iha terrenu. Ida-ne’e bele fasilita ha’u hanesan jornalista sai multitarefa tanba iha tanba rekursu umanu iha TATOLI ne’e menus, entaun ha’u tenke hala’o servisu hanesan multifunsaun (one man and one tim),” nia dehan.
Maske nune’e, nia nafatin rekomenda atu formasaun ne’e labele para de’it iha teória maibé tenke prátika no tenke fasilita mós materiál sira atu utiliza iha servisu fatin.
Entretantu, atividade formasaun ne’e sei hala’o durante semana ida hahú husi Segunda (23 Fevereiru) to’o iha Sesta (27 Fevereiru) 2026.
Jornalista : Alexandra da Costa
Editór : Cancio Ximenes
