OEKUSI, 16 Fevereiru 2026 (TATOLI) – Ensinu Bázika Sentrál (EBC, sigla portugés) primeiru, segundu no terseiru siklu Tula-Ika Aenmat, iha suku Lifau, sub-rejiaun Rejiaun Administrativa Espesiál Oekusi Ambeno (RAEOA), rekomenda ba Governu liuhusi Diresaun Rejionál Edukasaun no Solidariedade Sosiál Oekusi, atu konsidera preokupasaun eskola referida hodi integra iha Planu Asaun Anuál (PAA) atu aumenta saladeaula no konstrui morru protesaun.
Notísia relevante: Edukasaun Oekusi sei halo auditória ba ezekusaun fundu konsesaun eskolár
Diretór EBC primeiru, segundu no terseiru siklu Tula-Ika Aenmat, Domingos Nessi, relata totál estudante ativu iha EBC Tula-Ika Aenmat, númeru boot hamutuk 840, ho profesór na’in-20, komposta husi primeiru no segundu siklu na’in-11 ho estudante 400-resin, terseiru siklu na’in-sia ho estudante 300-resin.
“Entaun ami-nia problema iha-ne’e saladeaula, iha turnu dadeersan no lokraik tanba kondisaun, tanba ne’e ami iha rekomendasaun ida ba serbisu edukasaun, ba futuru aumenta saladeaula, tanba iha dadeer primeiru no segundu siklu okupa sala 12, iha klase primeiru ano to’o sextu anu fahe ba turma A no B, nune’e mós iha terseiru siklu iha sala neen, ne’ebé la to’o, entaun ami espera ba oin aumenta saladeaula,” nia hateten iha EBC Tula-Ika Aenmat Oekusi, ohin.
Aleinde menus saladeaula, manorin na’in-ne’e mós rekomenda ba Governu liuhusi serbisu edukasaun rejiaun Oekusi, atu integra iha Planu Asaun Anuál tinan tuir mai hodi konstrui morru permanente iha eskola.
“Iha-ne’e mós iha difikuldade uitoan kona-ba área eskola, dalaruma animál hodi estraga ai-fuan no ambiénte eskola nakonu ho foer, entaun presiza morr permanente haleu áreadór eskola referida,” nia husu.
Notísia relevante:CARE –ME abertura distribuisaun revista Lafaek edisaun dahuluk 2026 iha EBC Tula-Ika Oekusi
Hatán ba rekomendasaun ne’e, Diretór Rejionál Edukasaun no Soliadriedade Sosiál, Vincêncio Cono, rekoñese, menus saladeaula la’ós akontese de’it iha EBC 1,2,3 Tula-Ika Aenmat maibé kuaze eskola barak enfrenta problema hanesan.
“Lamentasaun sira-ne’e normál ba saladeaula menus, entaun dirijente eskola sira tenki iha jestaun di’ak atu fahe tuir siklu, tanba iha fatin balun, edifisíu balun la sufisiénte mezmu primeiru no segundu siklu de’it, sira koloka balun tama ho lorokraik, balun terseiru siklu eziste klase ida to’o klase sia, tau terseiru siklu iha lorokraik, entaun fó biban ba estudante sira bele aprende ho di’ak, maibé ba oin ita ei tau ba planu nafatin atu bele aumenta tan, maibé la’os hot-hotu, fazeadamente, haree uluk eskola ne’ebé mak presiza tebes tulun liu-liu ba saladeaula,” nia promete.
Notísia relevante: Edukasaun Oekusi identifika ona suku ualu atu harii Ensinu Pré-Eskolár iha 2026
Jornalista: Abílio Elo Nini
Editór: Evaristo Soares Martins
