OEKUSI, 16 Fevereiru 2026 (TATOLI) – Juíz Administradór Tribunál Judisiál Primeira Instansia iha Rejiaun Administrativa Espesiál Oekusi Ambeno (RAEOA), Evangelino Belo, fó-sai katak, kazu pendente dezde 2024 to’o 2025 ne’e hamutuk 481 tanba númeru juiz na’in-rua de’it mak funsiona prosesu julgamentu iha tribunál Oekusi.
Notísia relevante: Féria judisiál, julgamentu iha Tribunál Oekusi ba de’it kazu urjente
Juíz Evangelino Belo informa, kazu 481 ne’e rejista husi 2024 to’o 2025, ne’ebé maioria violénsia doméstika, kontra-bandu no krime seksuál.
“Iha-ne’e juíz na’in-rua de’it, ne’ebé dalaruma difikulta serbisu tribunál nian, julgamentu koletivu ladún la’o normál, entaun kazu pendente sei kontinua aas nafatin,” nia informa iha tribunál Oekusi, ohin.
Autoridade judisiál ne’e, orgullu tanba dezde Outubru 2025, Tribunál Judisiál Primeira Instánsia hetan kolokasaun juís estajiariu na’in-rua, konsege redús ona kazu pendente balu.
“Antes ne’e ami na’in-rua de’it, julgamentu koletivu fulan ida dala ida de’it, labele halo semana-semana, maibé ho prezensa juiz estajiáriu na’in-rua, sira mai iha ne’e dezde Outubru 2025 to’o ohin loron ami bele halo fali julgamentu koletivu ne’e kada semana, kuandu sira seidauk mai, ami hala’o kada fulan dala ida de’it, tan ne’e ami husu katak, ami-nia nesesidade ba oin presiza juiz ida tan hodi kompleta koletivu ne’e,” nia hateten.
Notísia relevante:Kazu jogu online iha Oekusi, Tribunál aplika prizaun preventiva ba arguidu na’in-neen
Entretantu, kazu pendente 481 ne’e, komposta husi kazu prosesuál sivíl 119, kazu krime 362, ho totál juís na’in-haat, komposta husi juís administradór ida, juís direitu ida no juíz estajiariu na’in-rua, no mós ofisiál justisa hamutuk na’in-11.
Notísia relevante: Enkontru kortezia ho PA RAEOA, Juís tribunál Oekusi aprezenta problema rua
Jornalista: Abílio Elo Nini
Editór: Evaristo Soares Martins
