DILI, 11 Fevereiru 2026 (TATOLI) – Komisaun Nasionál Eleisaun (CNE, sigla portugés) kontinua hala’o atividade edukasaun sívika ba sidadaun sira iha territóriu hodi hatene polítika Estadu ba podér lokál relasiona ho eleisaun kámara munisipál no asembleia munisipál.
Prezidente CNE, José Agostinho da Costa Belo, dehan edukasaun sívika ba sidadaun sira ne’e ho objetivu atu hasa’e partisipasaun parte hotu nian hodu partisipa iha prosesu eleisaun ne’e.
Aleinde ne’e, realiza mós debate iha nivel munisípiu husi partidu polítiku, feto pontesiál no foinsa’e sira hodi fó sira-nia vizaun hanesan interasaun importante hodi tuir eleisaun sira ho responsabilidade.
“Podér lokál ne’e importante. Foin dahuluk eleisaun ida atu halo, ne’ebé ita hotu serbisu hamutuk, liuliu partidu sira ne’ebé atu sai konkorrente tenke prepara an”, nia sujere.
CNE iha 18 Fevereiru sei halo abertura edukasaun sívika ba partidu polítiku sira hahú iha Aileu no sei ba munisípiu seluk hodi halo sensibilizasaun ba lei sira ne’ebé iha.
Nu’udar órgaun eleitorál ho Sekretáriadu Tékniku Administrasaun Eleitorál (STAE) preparadu atu organiza eleisaun rua ne’e iha nível munisípiu, tanba laiha diferensa ho eleisaun jerál ne’ebé iha.
Lembra katak, iha 29 Dezembru 2025, Governu sentrál liuhusi Ministériu Administrasaun Estatál (MAE) hamutuk ho Prezidente Autoridade Munisípiu sira hotu halo reuniaun hodi aprezenta rezultadu prelimináriu ba avaliasaun kondisaun mínima munisípiu sira. Nune’e, iha munisípiu lima mak hetan valór muito bom no hitu hetan bom.
Relatóriu ne’e sei aprezenta ba Konsellu Minstru mak sei pronúnsia munisípiu lima ne’e nia naran.
Tuir planu, munisípiu sira ne’ebé prienxe ona kondisaun mínima sei hakat ba eleisaun kámara munisipál iha tinan 2027.
Notísia relevante: CNE fasilita edukasaun sívika kona-ba eleisaun munisipál ba alunu sira iha Kovalima
Jornalista: Nelson de Sousa
Editora: Maria Auxiliadora
