DILI, 23 Fevereiru 2026 (TATOLI)–Governu liuhusi Ministériu Juventude Desportu Arte no Kultura (MJDAK) realiza semináriu durante loron tolu (3) hahú 23-25 fulan-Fevereiru ne’e hodi ko’alia kona-ba Lei no regulamentu administrativa no ezekusaun orsamentu.
Partisipa iha semionáriu ne’e mai husi parseiria desportiva no juventude ne’ebé durante ne’e hetan apoiu másimu husi MJDAK hodi hala’o atividade iha nasionál no Munisípiu.
“Semináriu ne’e importante tebes, liuliu ko’alia kona-ba ezekusaun orsamentu. Ida-ne’e atu lori ita evita komete iregularidade bainhira ezekuta orsamentu ne’ebé aloka husi MJDAK ba parseria sira tantu juventude no desportiva,” Inspetór Jerál MJDAK, João dos Santos, hateten iha nia diskursu, bainhira partisipa iha semináriu ba loron dahuluk ne’ebé realiza iha Salaun Xanana Sport Centre, Dili, segunda ne’e.
Nia dehan, matéria ne’ebé Gabinete Auditoria MJDAK prepara ba semináriu ne’e mai husi parte keta-ketak.
“Matéria ne’ebé prepara ba loron tolu nian mak sira husi Institutu Nasionál Seguransa Sosiál (INSS) sei ko’alia liu matéria kona-ba seguransa sosiál nian. Aban loron tomak, sira husi Minsitériu Finansa (MF) mak sei mai ko’alia kona-ba dekretu sira ezekusaun nian, dekretu ba aprovizionamentu nian no dekretu sira ba suvensaun públika. Sira mai fó atu nune’e ita bele kumpre no halo tuir. Iha loron datolu nian, sira husi Komisaun Antí Korrupsaun (KAK), ita bolu KAK mai ne’e atu ko’alia no fó hanoin nafatin mai ita bainhira halo ezekusaun ba orsamentu Estadu nian labele iha korrupsaun,” nia dehan.
Iha okaziaun ne’e, nia hato’o agradesimentu ba parseriu sira-nia prezensa no fiar katak durante loron tolu ne’e bele aprende buat ruma iha semináriu referidu.
Iha fatin hanesan, Xefe Gabinete MJDAK, Egas Barros Guterres Gudinho, reforsa semináriu ne’e importante tebes atu partisipante sira tuir hodi hasa’e liután abilidade iha ezekusaun orsamentu ne’ebé MJDAK atribui kada tinan.
“Semináriu ne’e importante tebes, ita-boot sira presiza atu tuir duni oinsá bele hatene kona-ba ezekusaun orsamentu atu labele mosu iregularidade. Atividade hanesan ne’e, ita halo kada tinan, atu loke ita-boot sira-nia hanoin, la’ós atu julga ita-boot sira konba-ba reletóriu sira tinan kotuk ita-boot sira halo sala, maibé hamutuk atu hadi’a ba oin,” nia hateten.
Nia hatutan, bainhira termina semináriu ne’e, ida-idak fila ba nia fatin, haree didi’ak Lei sira no regulamentu sira atu la’o tuir, tanba orsamentu ne’ebé kada tinan MJDAK aloka ba parseria sira-ne’e povu nian tenke ezekuta tuir regulamentu.
Jornalista : Hortencio Sanchez
Editór : Cancio Ximenes
