KOVALIMA, 27 Fevereiru 2026 (TATOLI)- Ministériu Juventude, Desportu, Arte no Kultura (MJDAK), liuhusi Diretór Jerál, David Tomas de Deus, Reprezentante UNICEF, hamutuk ho Centru Juventude Munisípiu Kovalima, inaugura konstrusaun sentru asesibilidade ba Ema ho Defisiénsia (EhD), iha munisípiu Kovalima.
Sentru asesibilidade ba EhD atu fasilita joven sira inklui Ema ho Defisiénsia bele iha partisipasaun ba igualdade iha programa, servisu no atividade iha Sentru Juventude ne’e.
“Ita hakarak espasu bele asesivél ba ema hotu tanba iha implementasaun Planu Asaun ba EhD konstrui asesibilidade. Konstrusaun ne’e hetan apoia finanseira husi UNICEF. Ita konstrusaun asesibilidade ba EhD,” Diretór Jerál MJDAK, David Tomas de Deus, hato’o ba Jornalista sira, iha Suai, ohin.
Tuir dadus iha 2025, MJDAK hetan apoia finaseiru husi UNICEF konsege konstrui ona sentru asesibilidade iha Sentru Juventude Kovalima, Bobonaro no Dili iha Komoro ho totál orsamentu hamutuk $37.000.
Tuir planu MJDAK kontinua Konstrui asesibilidade iha sentru Juventude rua ne’ebé mak seidauk identifika, nune’e bele fó espasu ba EhD.
Iha fatin hanesan, Konsultan Asuntu Defisiénsia UNICEF, José Amaral do Carmo, dehan UNICEF fó apoiu finanseira atu halo konstrusaun asesibilidade ba EhD sira.
“UNICEF la’os fó apoiu finanseira de’it, maibé servisu mós parte ida inkluzaun defisiénsia ni’an servisu hamutuk ho MJDAK oinsá ita bele asegura partisipasaun hanesan,” nia afirma.
Tuir planu atu kontinua konstrui asesibilidade iha Sentru Juventude rua ne’e sei iha prosesu diskusaun, nune’e Sentru Juventude sira asesivél ba ema hotu.
Entretantu, Diretór Ezekutivu Sentru Juventude Kovalima, Júlio Ferreira, reforsa katak Sentru Juventude Kovalima apresia inisiativa husi parte Governu, nune’e bele asesivél ba EhD.
“Ita la’os ko’alia de’it ba prosesu aprendijazen, maibé oinsá mak fó importánsia ba maluk defisiénsia sira haree ba prosesu aprendijazen formasaun ba Komputadór, Inggris no seluk tan,”nia esplika.
Jornalista: Celestina Teles
Editór:Florencio Miranda Ximenes
