KOVALIMA, 27 Fevereiru 2026 (TATOLI)- Gabinente Prezidénsia Repúblika (GPR) liuhusi Unidade Asuntu Sosiál, Asesór Prinsipál, Quintiliano Moniz, hamutuk ho Komandante PNTL Munisípiu Kovalima , tau fatuk dahuluk konstrusaun uma-dignu ba inan faluk Olanda Maria de Jesus, Aldeia Manekin, Suku Kamnasa, postu Administrativu Suai, Munisípiu Kovalima.
Konstruisaun uma-dignu ne’e inisiativa husi Prezidente-Repúblika, José Ramos Horta hodi apoia inan faluk Olanda Maria de Jesus, ho medida 7×8 ho pakote kobre hanesan sasán uma-laran ho totál orsamentu $14,511. Ho prosesu kontrusaun durante fulan-tolu.
“Ita mai lori Prezidente no Governu nia naran, ita halo lansamentu fatuk ba dahuluk konstruisaun uma dignu ba família vulnerável,” Asesór Prinsipál Prezidensiál Repúblika, Quintiliano Moniz hato’o ba jornalista sira, hafoin tau fatuk dahuluk ba konstrusaun ne’e iha suku Kamnasa-Suai, ohin.
Konstrusaun ba uma referidu, nia dehan tanba Prezidente Repúblika simu proposta autoridade lokál iha tinan-2025, nune’e Xefe Estadu ho inisiativa ne’ebé nakonu ho domin apoia.
Tuir dadus 2025 nian, Prezidente Repúblika konsege konstrui uma-dignu ba família kbi’it la’ek sira hamutuk 30-resin.
Iha fatin hanesan, Benefisiária ba uma-dignu, Olanda Maria de Jesus, sente kontente no agradese tanba bele hetan apoia husi Prezidente Repúblika.
“Ha’u sente kontente tanba bele hetan apoia konatruisaun uma husi na’in Prezidente Repúblika haree. Ha’u nia kondisaun uma ladun di’ak ona, nune’e ami labele tuur ami taka deit ho lona tanba ne’e hau agradese Prezidente-Repúblika,” nia agradese.
Benefisiária ne’e ho kondisaun saúde ema ho defisiénsia, hamutuk ho nia oan na’in lima, tanba nia katuas oan husik hela nia iha 2013.
“Ha’u iha oan nain lima kompostu husi feto rua no mane nain tolu. Ha’u nia oan mane servisu iha Loes no balun sei eskola,” nia dehan.
Jornalista: Celestina Teles
Editór:Florencio Miranda Ximenes
