VIKEKE, 04 Marsu 2026 (TATOLI)—Ministériu Justisa (MJ) liuhusi Diresaun Rejistu Notariadu Nasionál, Kuarta ne’e, realiza formasaun ba xefe suku, xefe aldeia sira no pesoál saúde husi Postu Administrativu Ossú no Uatulari, Munisípiu Vikeke, kona-ba prosesu emisaun sertidaun moris labarik sira-nian husi idade 0 to’o idade tinan lima (5).
Reprezentante Diretór Jerál Notariadu Nasionál Munisípiu Vikeke, Rogério da Costa, haktuir objetivu husi formasaun ne’e atu hasa’e koñesimentu autoridade sira kona-ba prosesu prenxe dokumentu labarik sira husi idade 0-5.
“Liuhusi formasaun ne’e atu kapasita ita-nia autoridade lokál, delegadu, delegada no parteira sira atu fila bá idaidak nia suku karik sira iha ona koñesimentu ba prosesu emisaun sertidaun moris nian. Tan ne’e, ha’u husu autoridade nafatin koopera ho notariadu atu fasilita ita-nia oan sira bele hetan sertidaun moris,” Rogério da Costa hateten iha Salaun Adminsitrasaun Munisípiu Vikeke.
Atuál Diretór Konservatóriu Servisu Notariadu Rogério ne’e esplika programa ne’e iha kooperasaun ho Ministériu Administrasaun Estatál (MAE), Ministériu Edukasaun (ME), Ministériu Saúde (MS) no Igreja.
Nia solisita sidadaun sira kontinua hakbesik bá rejistu notariadu hodi komprova nasionalidade timoroan nian.
Iha fatin hanesan, Prezidente Autoridade Munisípiu Vikeke, Francisco C. S de G. Soares, husu autoridade lokál sira atu fó-atensaun ba formasaun hodi kontinua sensibiliza ba komunidade ne’ebé iha baze atu komunidade bele rejista labarik sira hodi hetan sertidaun moris.
“Ha’u sente formasaun ne’e importante tebes tanba ko’alia kona-ba prenxementu formatu sertidaun moris nian, atu ajuda ita-nia oan sira bele hetan sertidaun moris. Dokumentu sira-ne’e ajuda tebes labarik sira hodi prova identidade ofisiál labarik sira-nian hodi asesu ba edukasaun,” nia subliña.
Entretantu, formasaun ne’e oferese husi ekipa notariadu sira husi nasionál durante loron rua, hahú 04-05 Marsu. Partisipa iha formasaun ne’e kompostu husi xefe suku, xefe aldeia, delegadu/delegada no parteira sira husi Ossú no Uatulari.
Jornalista: Vitorino Lopes da Costa
Editór: Xisto Freitas da Piedade
