DILI, 06 Marsu 2026 (TATOLI)—Grupu feto Klibur Síndikatu Timor-Leste (KSTL) realiza konferénsia imprensa hodi tau importánsia papél feto iha misaun dezenvolvimentu sustentavel iha ámbitu komemorasaun loron internasionál ba feto iha mundu tomak ho títulu “Asesu justisa ba feto iha servisu fatin no saláriu dignu ba traballadór sira hotu”.
Loron 08 Marsu nu’udar loron ida ne’ebe importante tebes ba Feto hotu-hotu iha Mundu hodi selebra loron feto nian, atu fó rekoñesementu no dignifika kontribuisaun feto-nian hodi promove igualdade, respeita no asegura feto sira-nia direitu sein halo diskriminasaun no violénsia hasoru feto.
Portavóz feto KSTL, Manuela Gamboa, hateten onra ida ba komisaun feto KSTL hodi komemora loron internasionál feto, tanba loron feto mak loron ida ne’ebé mais importante tebes hodi refleta kona-ba papel feto nian iha sira-nia misaun hodi kontribui ba desenvolvimentu ne’ebé sustentavel.
“Husi parte komisaun feto KSTL eziji ba Governu atu promove no investe ba programa traballu dignu iha polítikia Governu nian, tanba traballadór sira-nia prespetiva kona-ba traballu dignu nu’udar sentru ba dezenvolvimentu sosiál no ekonomia iha Timor-Leste,” Portavóz feto KSTL ne’e hateten ba jornalista sira iha edifísiu KSTL Bemori, ohin.
Nia konsidera, husi evidénsia iha mundu katak traballu dignu nu’udar dalan ida-ne’ebé sustentavel atu aselera kreximentu ba produsaun no empregu hodi hasa’e tempu ka ritmu ba redusaun pobreza, hari’i demokrásia no koezaun sosiál.
“Ema hotu iha estratéjia rasik atu partisipa iha dezenvolvimentu, importante liu mak kooperasaun entre mane no feto kompleta malu atu alkansa dezenvolvimentu no atinjr hamutuk. Maibé, iha realidade ohin loron nian, feto sira konsidera fraku no marjianaliza feto ka tau feto nia ideia iha ninin liu, la konsidera sira-nia ideias. Situasaun sira-ne’e nafatin buras iha sosiedade,” nia dehan.
Nune’e, husi parte komisaun feto KSTL nafatin tau prioridade ba direitu feto nian atu ajuda hametin igualdade jéneru ba feto sira hodi promove sira-nia partisipasaun no movimentu sosiál sira ba mudansa iha sosiedade.
Iha biban ida ne’e mós komisaun feto KSTL hakarak reafirma hodi halo kompromisu atu halo advokásia hodi promove no proteje feto sira-nia direitu, liuhusi dalan legál ne’ebé vigora ona iha Timor-Leste ho igual, justu no seguru.
Tuir membru KSTL, Etelvina Sarmento, informa durante ne’e KSTL halo ona advokásia kona-ba igualdade jéneru ba munisípiu sira hanesan Baukau, Ermera, RAEOA, Dili, no husi ne’e ninia progresu la’ós atu halakon totál diskrimisaun maibé oinsá mak minimiza.
“Iha tinan 2025 kuaze KSTL rejista traballadór sira-ne’ebé mai hato’o keixa hamutuk 122 kompostu husi tipu kazu hapara kontratu servisu, diskriminasaun, asédiu no lamentasaun sira iha servisu fatin. Iha 2026, foin traballadór feto ida mak hato’o keixa kona-ba kondisaun grávida jestór sira haruka hi’it sasán todan, entaun ita halo kedas medida prevensaun,” nia dehan.
Jornalista : Alexandra da Costa
Editór : Cancio Ximenes
