BOBONARU, 12 Marsu 2026 (TATOLI)-Primeiru Ministru (PM), Xanana Gusmão, inaugura edifísiu atendimentu Balkaun Úniku (BU) iha munisípiu Bobonaru hodi hakbesik prestasaun servisu ba sidadaun sira, moderniza no simplifika servisu atendimentu ba públiku ho lalais no fásil, no promove transparénsia hodi bele lori governasaun di’ak besik liu ba povu.
Balkaun Úniku ne’e estabelese ba dasiak iha territóriu, liuliu iha Bobonaru, ne’ebé mai ho ekipamentu foun no lori serbisu governamentál sira atu trata kartaun identidade (BI), pasaporte, no sertidaun kriminál, hodi hamenus tempu, kustu, no todan ba viajen sidadaun sira ne’ebé hela dook husi kapitál.
“Uza ida-ne’e ho di’ak, evita falsifikasaun de dadus, falsifikasaun dokumentu. Imi iha ne’e mós servisu ho responsablidade, integridade”, Xanana hateten iha ámbitu inaugurasaun ne’e.
Ministru Administrasaun Estatál, Tomás Cabral, afirma katak inaugurasaun ne’e marka pasu signifikativu ida iha kompromisu Governu nian hodi hakbesik administrasaun públika ba sidadaun sira.
Notísia relevante: Hakbesik atendimentu ba povu, MAE inaugura Balkaun Úniku iha Oekusi
“Balkaun Úniku ida-ne’e bele fasilita no governasaun besik liután ba povu. Ida-ne’e sai sentru ida Governu sentrál nian, informasaun tomak iha ne’e, balkaun iha vantajen mak ema atu mai trata dokumentu ita tama, ita dada númeru, laiha ema ida mai mak reprezenta”, ministru hateten.
Repezentante Programa Nasaun Unida ba Dezenvolvimentu (PNUD), Katyna Argueta, afirma katak inisiativa ida-ne’e aliña ho objetivu boot atu hametin kapasidade institusionál no promove governasaun inkluziva. Modelu “One-Stop Shop” ne’e sai nu’udar ezemplu ba prestasaun serbisu ne’ebé efisiente, transparente, no foka ba sidadaun.
Nia kongratula Governu Timor-Leste iha marku importante ida-ne’e atu haforsa liután prestaun servisu públiku ba sidadaun sira.
PNUD komprometidu hodi serbisu hamutuk ho Governu no povu Timor-Leste atu haforsa liután instituisaun, hadi’a servisu no apoia dezenvolvimentu sustentavel iha munisípiu tomak.
“Ida-ne’e hanesan atinje ida ne’ebé notavel tebes-tebes. Ida-ne’e inisiativa ida ne’ebé ita hotu tenke orgullu ba iha tempu hanesan, susesu husi inisiativa ida-ne’e, la’ós de’it depende ba infraestrutura ne’ebé ke ita inaugura ohin loron, maibé sei depende liután ba iha kompromisu ne’ebé kontinua ba servisu ne’ebé ho kualidade, akuntablidade no servisu ne’ebé bele responde ba sidadaun nia nesesidade”, nia dehan.
Prezidente Autoridade Munisípiu Bobonaru, Paulo Moniz Maia, agradese ba Governu no parseiru PNUD ne’ebé estabelese ona edifísiu ne’e. “Maski edifisíu ida-ne’e ki’ik, maibé ohin no aban ba oin ita-nia sidadaun sira bele mai trata ona dokumentu iha ne’e”, katak.
Estabelesimentu Balkaun Úniku Bobonaru nian ne’e mak rezultadu husi kolaborasaun forte entre Ministériu Administrasaun Estatál no Ministériu Justisa, ho apoiu husi PNUD Timor-Leste. Sinerjia interministeriál ida-ne’e asegura katak koñesimentu tékniku husi Ministériu Justisa integra ona iha MAE nia kbiit governasaun lokál nian.
Instalasaun Bobonaru nian ne’e mak Balkaun Úniku ba dasiak ne’ebé operasionál ona iha munisípiu sira iha nasaun laran, hafoin susesu iha inaugurasaun sira iha Manatutu, Baukau, Likisá, Ataúru, Aileu, Manufahi, Oekuse no Kovalima.
Notísia relevante: MAE inaugura sentru atendimentu balkaun úniku iha Kovalima
Jornalista: Sergio da Cruz
Editora: Maria Auxiliadora
