BAUKAU, 13 Marsu 2026 (TATOLI)—Vise-Ministru Administrasaun Estatál, Jacinto Rigoberto husu Baukau-oan presiza atu hametin unidade hodi simu podér lokál no desentralizasaun administrativa.
Vise-Ministru Administrasaun Estatál, Jacinto Rigoberto de Deus esplika fatór seguransa nu’udár rekizitu importante atu Governu sentrál deside implementa podér lokál, tanba ne’e nafatin husu entidade hotu-hotu atu prepara an, hatudu espíritu kolaborasaun no hametin unidade nune’e garante estabilidade iha Munisípiu Baukau.
“Imi-nia serbisu liuliu imi-nia rekursu sira inklui rekursu umanu no ida inportante liu mak imi-nia unidade. Dezenvolvimentu ba munisípiu ida la’ós fó ba grupu ida ka fó ba partidu ida,” Vise Ministru Administrasaun Estatál hateten bainhira partisipa iha reuniaun koordenasaun ho membru Konsellu Koordenasaun Munisipál (KKM) iha salaun apuramentu Vila Nova, Baukau, Sesta ne’e.
Governante ne’e enkoraja autoridade munisipál to’o lokál atu hatudu prestasaun serbisu, espíritu kolaborasaun no hametin unidade liuhusi vizita Primeiru-Ministru, Xanana Gusmão iha semana-oin tanba rezultadu avaliasaun kondisaun mínima ne’ebé fó-sai Munisípiu Baukau hetan valór muito bom seidauk garante atu implementa desentralizasaun administrativa iha faze dahuluk.
Jacinto Rigoberto rekoñese istorikamente Munisípiu Baukau nu’udár segundu kapitál ne’ebé iha kondisaun hanesan infraestrutura ne’ebé adekuada no rekursu ne’ebé sufisiente nune’e hafásil Baukau atu deside no jere rasik bainhira simu podér lokál ba desentralizasaun administrativa.
“Ukun-an ne’e labele sentraliza de’it iha nasionál maibé tenke hahú desentraliza ona ba munisípiu sira, hili tinan ida-ne’e halo avaliasaun atu korresponde ba tinan 24 ita-nia luta iha ai-laran hodi hetan independénsia,” Jacinto Rigoberto akresenta.
Iha fatin hanesan, Prezidente Autoridade Munisipál (PAM) Baukau, Veneranda Eurico Lemos Martins hato’o agradese ba prezensa vise-ministru ne’ebé partisipa ona iha reuniaun Konsellu Koordenasaun Munisipál (KKM) hodi fó apoia no kontribui hanoin kona-ba preparasaun simu vizita Governu sentrál lideradu Primeiru-Ministru, Kay Rala Xanana Gusmão relasiona ho polítika implementasaun desentralizasaun administrativa.
“Ha’u mós ohin relata ba vise-ministru katak aprezentasaun ne’ebé ita prepara lori mai hetan aprovasaun no apresiasaun iha Konsellu Konsultivu ne’ebé aas liu no ohin ita lori fali mai iha reuniaun koordensaun,” Veneranda Lemos hateten.
Autoridade Munisipál Baukau realiza reuniaun koordenasaun ho Vise-Ministru Administrasaun Estatál, Jacinto Rigoberto de Deus hodi aprezenta matéria kona-ba serbisu administrasaun ligadu ho podér lokál desentralizasaun administrativa no halo koordenasaun serbisu ho Ministériu Administrasaun Estatál (MAE) kona-ba vizita Governu sentrál ne’ebé sei hala’o iha loron 17 Marsu.
Entretantu, reuniaun koordenasaun partisipa husi membru Konsellu Koordenasaun Munisipál (KKM) hamutuk membru na’in-64, kompostu husi Prezidente Autóridade Munisipál, Sekretáriu Munisipál, Administradór Postu Administrativu, reprezentante Xefe Suku, Diretór Serbisu Munisipál no Dirijente Delegasaun Territoriál.
Jornalista: Natalino Belo
Editór: Xisto Freitas da Piedade
