DILI, 16 Marsu 2026 (TATOLI)—Diretór Servisu Apoiu Diagnostiku no Terapéutiku iha HNGV, Vidal de Jesus Lopes, hateten bebé feto ho moras Hidrosefalus ne’e nafatin halo tratamentu, tanba rezultadu husi CT-Scan hatudu bebé nia kakutak laiha, matan sorin laiha no fuan la normál, nune’e médiku sira deside sei halo tratamentu konservativu iha HNGV.
Notísia Relevante: Aban, médiku sei halo CT-Scan ba bebé feto “Hidrosefalus” nia ulun
“Bebé feto ne’e nafatin baixa iha HNGV durante loron 25 ona, iha unidade perinatolojia, tanba bebé ne’e moris mai ho malformasaun barak, ne’ebé afeta ba iha ulun, matan no fuan. Husi rezulatdu CT-Scan ne’e maki ha posibilidade boot halo tratamentu konservativu de’it iha HNGV,” Vidal Lopes hateten ba jornalista sira iha nia kna’ar fatin HNGV, Bidaun, ohin.
Nia afirma, bebé nia kondisaun hanesan ne’e HNGV labele halo transferénsia ba rai-li’ur atu halao tratamentu tanba kondisaun saúde bebé ne’e la permite.
“Ba transferénsia rai-li’ur ita la halo, tanba kondisaun bebé nia la permite. Ita hakarak transferénsia ba rai-li’ur ho kondisaun ne’ebé mak di’ak, agora situasaun hanesan ne’e pratikamente ita haruka ba li’ur atu halo tratamentu ba bebé nia saida, tanba moris mai ho malformasaun kedas. Bazeia ba diskusaun entre diresaun kliniku ho médiku sira katak ho bebé nia kondisaun hanesan ne’e pursentu kiik loos haruka ba rai-li’ur,” nia dehan.
Antes ne’e, Diretór Ezekutivu Hospitál Nasionál Guido Valadares (HNGV), Nuno Vital, dehan bebé feto ne’ebé mak moris mai ho kondisaun hidrosefalus ne’e médiku sira konsidera kazu emerjénsia no halo ST-Scan ba bebé nia ulun.
“Bebé ho kondisaun hidrosefalus ne’e ami haree husi parte kliniku nian sei rona informasaun husi médiku sira liuhusi teste sira-ne’ebé mak iha, tanba normalmente kazu sira hanesan ne’e presiza halo elaborasaun di’ak antes foti desizaun. Entaun, agora daudaun ami haree hela bebé nia kondisaun no haree mos sinál vit’al sira, depois halo CT- Scan hodi haree didi’ak tipu hidrosefalus ne’ebé bebé sofre hela iha nia ulun,” Nuno Vital dehan.
Durante ne’e, HNGV rejista ona kondisaun bebé hidrosefalus hamutuk na’in-lima (5) ne’ebé mak iha, agora teknikamente sira halo de’it prosidementu no halo klasifikasaun ba likidu ka bee ne’ebé mak iha ulun, hanesan tipu ida halo intervensaun iha HNGV ka presiza halo intervensaun iha rai-li’ur.
Nia relata, kazu sira hanesan ne’e HNGV presiza rapidu no asegura bebé sira no pasiente ne’ebé mak iha HNGV, tanba ne’e HNGV konsidera kazu ne’e emerjénsia.
Notísia Relevante: Inan ne’ebé abandona nia oan iha HNGV entrega-an ba PNTL
Jornalista : Felicidade Ximenes
Editór : Cancio Ximenes
