BAUKAU, 17 Marsu 2026 (TATOLI)—Governu liuhusi Ministériu Administrasaun Estatál (MAE) rekomenda pontu haat ba Autoridade Munisipál Baukau atu kumpri nu’udár rekizitu atu simu podér lokál no desentralizasaun administrativa.
Ministru Administrasaun Estatál (MAE), Tomás do Rosário Cabral liuhusi aprezentasaun rezultadu avaliasaun kondisaun mínima rekomenda pontu haat atu Autoridade Munisipál Baukau (AMB) hadi’a no kompleta nune’e prenxe rekizitu hodi implementa podér lokál no desentralizasaun administrativa.
Pontu haat ne’ebé Governu sentrál rekomenda mak hanesan planeamentu no monitorizasaun, jestaun finanseiru no aprovizionamentu, kontratasaun públika no ikus mak monografia no demografia.
“Rekomendasaun bazeia ba prezensa ekipa avaliasaun kondisaun mínima,” Ministru Administrasaun Estatál Tomás Cabral hateten iha Sentru Konvensaun Baukau (CCB-sigla portugeza) Vila Antiga, Tersa ne’e.
Pontu haat iha leten, pontu dahuluk planeamentu no monitorizasaun ne’ebé presiza hadi’a pontu mak ho Sekretáriu Munisipál Asuntu Planeamentu Investimentu no Dezenvolvimentu Integradu tenke hamutuk ho ekipa Programa Nasionál Dezenvolvimentu Suku (PNDS), Serbisu Munisipál, Administradór Postu no suku atu akompaña iha sorumutu intgradu ba Planeamentu Investimentu Munisipál, rezultadu planeamentu sei inklui iha planu investementu no públika iha portál munisipál no presiza monitoriza ba programa ne’ebé implementa hanesan PDIM no PNDS.
Notísia relevante: Autoridade lokál prontu apoiu podér lokál no desentralizasaun administrativa iha Baukau
Husi parte jestaun finanseira no aprovizionamentu rekomenda atu AMB hadi’a iha parte tolu kompostu kria sistema kontrolu finanseiru hodi fasilita relatóriu finanseiru no relatóriu ezekusaun tenke kumpri ba prosedimentu legál ne’ebé vigór.
Pontu tolu kona-ba kontratasaun públika AMB tenke iha mapeamentu, planu orsamentu no kabimentu orsamentu no pontu dahaat ne’ebé presiza kompleta mak monografia no demografia liuliu obrigatóriu atualiza dadus no informasaun mensalmente husi nivel postu administrativu to’o suku.
“Fulan lima ami sei mai fali atu haree ninia rezultadu, tanba tuir lei sei aprezenta ba Konsellu Ministru sei aprova ho rezulusaun,” Tomás Cabral hateten.
Entretantu, husi rekomendasaun haat ne’ebé iha, ekipa nasionál mós observa serbisu tékniku balun ne’ebé presiza kompleta hanesan husu atu inísiu tinan-ne’e Munisípiu Baukau tenke aprezenta planu orsamentu no aprovizionamentu atu hetan aprovasaun husi superiór tutelada, ezekusaun orsamentu tuir kategoria, planu asaun anuál, planu investementu munisipál no planu aprovizionamentu hotu tenke públika iha portál munisipál.
Seluk, Diretór Serbisu Munisipál tenke submete relatóriu atividade mensál ba PAM, PAM tenke atribui orden ba Ajénsia Fiskalizasaun Munisipál, haforsa koordenasaun serbisu husi AMB to’o aldeia, presiza halakon egoista iha serbisu fatin no nesesita komunikasaun inklui koordeansaun di’ak.
Jornalista: Natalino Belo
Editór: Xisto Freitas da Piedade
