DILI, 18 Marsu 2026 (TATOLI) – Deputada husi Frente Revolusionária Timor-Leste Independente (FRETILIN), Maria Angélica Rangel, solisita ba dirijente Ospitál Nasionál Guido Valedares (HNGV, sigla portugés) atu mellora atendimentu bas pasiente sira ne’ebé fase raan.
Deputada ne’e dehan iha fiskalizasaun iha terrenu simu preokupasaun husi pasiente sira kona-ba oráriu ne’ebé HNGV iha atu halo tratamentu ba fase raan. Tanba pasiente sira atu foti númeru seña iha tuku 6 to’o 7h00 dadeer, maibé fó fali iha tuku 15h00 lokraik no fase raan iha tuku 17h00 to’o tuku 21h00 kalan.
“Imajina ema ne’ebé atu fase raan ne’e ho kondisaun saúde la estavel, ain no liman bubu no seluk tan. Ema bá tuur hein durante loron tomak, ita-boot sira-nia jestaun oinsá?”, nia levanta iha audiénsia públika entre Komisaun F ne’ebé trata Asuntu Saúde, Iguladade Jéneru no Inkluzaun Sosiál no Ministériu Saúde ho entidade tutela sira kona-ba relatóriu ezekusaun orsamentál no dezempeñu trismestre dahaat 2025 nian iha Parlamentu, ohin.
Hatán ba kestaun ne’e, Diretór-Ezekutivu HNGV, Nuno Vital Soares, klarifika katak HNGV antes ne’e halo ona oráriu fiksu no foin daudaun fó tan númeru seña nian.
“Fahe númeru ne’e tanba oráriu ne’ebé estabelese ona. Pasiente sira ne’e fahe ba turnu haat – dadeer, meudia, lokraik no kalan. Agora, dalabarak pasiente sira ne’ebé mai ne’e fahe ona tuir oráriu, más pasiente sira ho família mai oráriu dadeer, sira mai fali meudia, depois dadeer sira la mai tiha, entaun balun mai fali kalan”, nia esplika.
Dirijente ne’e klariufika katak ida-nee’e akontese beibeik maka ospitál prepara fali númeru seña hodi fahe ba família no pasiente sira hodi la’o tuir númeru de’it.
“Agora ami set up tan oinsá bele tau iha telefone ruma, depois bele liga, fó hanoin pasiente ou família sira. Bele la’o nafatin tuir númeru no oráriu ne’ebé sira simu ona atu sira-nia oráriu mai dadeer tenke mai dadeer duni, labele mai fali meudia ou lokraik hodi bele halo tratamentu fase raan”, katak.
Xefe Departamentu Medisina Interna iha HNGV, Gustavo do Rosário, relata katak mákina fase raan daudaun ne’e hamutuk 14, ne’ebé kada loron atende pasiente hamutuk 40.
Notísia relevante: Tinan 2025: Pasiente 129 fase raan iha HNGV no na’in-lima mate
Jornalist: Nelson de Sousa
Editora: Maria Auxiliadora
