DILI, 19 Marsu 2026 (TATOLI) – International Committee of the Cross (ICRC) entrega dokumentu istóriku Timor-Leste nian, ne’ebé liga ba istória pasada, ba Centro Nacional Chega! Institutu Públiku (CNC, I.P) hodi tau ba muzeu.
Dokumentu istóriku ne’e entrega husi Xefe ICRC ba ASEAN, Martin de Boer, ba Diretór-Ezekutivu CNC, I.P, Hugo Maria Fernandes, iha Antigu Komarka, Balide, Dili.
Hugo Fernandes agradese ba ICRC tanba iha relatóriu Chega! iha kapítulu haat hateten mínimu iha kontribuisaun signifikante husi dokumentu ho arkivu sira ne’ebé ICRC rai hela iha Timór iha períodu okupasaun nian.
“Ohin pasu dahuluk ICRC hahú entrega fotografia balun ne’ebé sai nu’udar dokumentasaun mai iha CNC. Iha mós intensaun atu kontinua kooperasaun ida-ne’e ba oin, tanba tuir regra protokoler ICRC nian, dokumentu sira sei bele nakloke bainhira liu ona tinan 40 depoizde eventu ida akontese”, Hugo Maria Fernandes hateten ohin.
Nia dehan dokumentu sira ne’ebé entrega ba CNC ne’e ICRC arkiva ICRC iha Jenebra. “Dokumentu sira ne’e ita sei tau iha Arkivu no Muzeu Rezisténsia hodi prezerva”, dehan.
Iha fatin hanesan, Martin de Boer, hateten dokumentu sira ne’ebé entrega ba CNC ne’e liga liu ba istóriu funu nian hahú husi 1974-1999. “Durante ita iha Timór kria dokumentasaun oioin, tantu foto sira nomós eskrita. Ohin, hanesan entrega dahuluk foto sira ne’ebé ita bele fahe, dokumentasaun sira seluk iha Jenebra, iha ami-nia sede arkivu”, dehan.
Tuit ICRC nia regra, dokumentu hothotu fó sai ba públiku tinan 40 hafoin eventu sira mak bele asesu ho neineik.
Jornalista: Arminda Fonseca
Editora: Maria Auxiliadora
