DILI, 24 Marsu 2026 (TATOLI) – Prezidente Parlamentu Nasionál, Maria Fernanda Lay, husu ba deputadu sira atu hamenus viajen bá rai-li’ur ne’ebé la nesesáriu hodi bele halo poupansa ba orsamentu Estadu.
“Ha’u, atu hato’o de’it, iha ona asaun poupansa iha nasaun ASEAN ninian, iha inísiu krize, ha’u hato’o ona para hamenus ita-nia fiskalizasaun bá, bainhira nesesáriu”, nia hato’o iha reuniaun plenária Parlamentu, ohin.
Hodi husu mós ba delegasaun bá rai-li’ur tenke tau-matan no la presiza ba ho ekipa boot. “Ida-ne’e asaun ita-nia, iha poupansa ba orsamentu, liga ho produsaun mina ninian, ne’ebé dala ida tan, ita hotu nia preokupasaun, mai ita tau iha prátika”, nia apela.
Lembra katak Parlamentu Nasionál iha Orsamentu Jerál Estadu (OJE) ba tinan fiskál 2026 hetan alokasaun $19.073.404 hodi aloka ba saláriu no vensimentu $11.217.005, bens no servisu $6.242.298, transferénsia públika $955.180, kapitál menór $658.921 no kapitál dezenvolvimentu laiha. Verba ida-ne’e hodi finansia prioridade ba programa haat, subprograma ualu no atividade 23.
Programa prioridade mak hanesan fomenta relasaun internasionál no kooperasaun Parlamentu, garante ezersísiu funsaun konstitusionál Parlamentu, promove kultura abertura no transparénsia iha Parlamentu no dezenvolvimentu institusionál.
Verba ba saláriu no vensimentu ne’e hodi selu saláriu deputadu, funsionáriu, asesór nasionál no internasionál.
Despeza bens no servisu utiliza bá viajen estranjeiru, viajen lokál, estudu komparativu, fiskalizasaun komisaun, realiza atividade semináriu, prémiu Max Stahl, apoiu serbisu komisaun rekrutamentu ba prokuradór no juis, servisu sekretariadu, Grupu Feto Parlamentár Timor-Leste (GMPTL, sigla portugés), hodi realiza atividade komemora loron família, loron internasionál rurál no nasionál, kampaña 16 loron ativizmu violénsia kontra feto no labarik feto.
Inklui servisu jerál ba kombustivel, manutensaun karreta, manutensaun edifísiu, materiál eskritóriu, limpeza no seluk tan.
Ba transferénsia públika hodi finansia subvensaun anuál ba bankada parlamentár sira ho seluk tan.
Kapitál menór sosa ekipamentu information technology, eletróniku, ekipamentu, komunikasaun, seguransa, melloramentu ba servedór ho akizisaun ekipamentu sira seluk.
Jornalista: Nelson de Sousa
Editora: Maria Auxiliadora
