BAUKAU, 26 Marsu 2026 (TATOLI)—Autoridade Suku Afasá, Postu Administrativu Kelikai Antigu, solisita Governu hasa’e orsamentu atividade Programa Nasionál Dezenvolvimentu Suku (PNDS).
Xefe Suku Afasá, Joaquim Fernandes Ximenes esplika dezenvolvimentu iha baze maioria foku liubá ba atividade regulár PNDS iha-ne’ebé liuhusi konsellu suku deside implementa programa ne’ebé kondis ho nesesidade bázika povu nian maibé tinan-ne’e alokasaun orsamentu menus nune’e difikulta autoridade lokál foti desizaun.
“Kuaze suku hotu orsamentu PNDS tun. Ida-ne’e ami preokupa maibé obrigadu implementa kuandu la sufisiente tenke para,” nia tenik.
Joaquim Ximenes konsidera alokasaun orsamentu PNDS tinan-ne’e ba Suku Afasá menus bainhira kompara ho tinan hirak liubá iha-ne’ebé hamutuk rihun $30-resin nune’e deside sei implementa reabilita estrada iha Aldeia Vekobuti ho distánsia metru 300.
Nia argumenta maski atuál iha prosesu finalizasaun administrasaun maibé ho alokasaun orsamentu ne’ebé ki’ik seidauk rezolve preokupasaun komunidade liuliu kondisaun estrada iha suku referidu tanba konsideradu sei kategoria grave.
“Ami rekomenda direta ona ba primeiru-ministru tanba benefísiu ba povu,” Joaquim Ximenes akresenta.
Autoridade Munisipál Baukau (AMB) tinan-ne’e liuhusi orsamentu jerál Estadu (OJE) hetan alokasaun orsamentu PNDS hamutuk millaun $2-resin ne’ebé fahe ba Suku 62 ne’ebé kobre ba operasionál no fundu infraestrutura.
Entretantu, Suku Afasá hamutuk aldeia tolu kompostu husi Suku Boralai, Uligata no Vekubuti ho totál populasaun hamutuk 2.163 kompostu mane 1.085 no Feto 1.078 husi uma-kain 574.
Jornalista: Natalino Belo
Editór: Xisto Freitas da Piedade
