KOVALIMA, 26 Marsu 2026 (TATOLI) – Sekretaria Estadu Igualdade Jéneru ( SEII), sensibiliza informasaun kona-ba igualdade Jéneru no Violénsia Bazeia ba Jéneru (VBJ) ba alunu sira iha Sentru Aprendizajen no Formasaun Eskolár (CAFE, sigla portugés) iha Munisípiu Kovalima.
Reprezentante Sekretáriu Munisipál Asuntu Sosiál no Organizasaun Komunitária, Maria de Jesus Amaral husu ba ulunu sira atu aproveita didi’ak programa sensibilizasaun husi SEII kona-bá violénsia bazeia ba Jéneru tanba importante tebes.
“Ohin ita-nia solializasaun (sensibilizasaun) igualdade jéneru no violénsia bazeia Jéneru ne’e importante ne’ebé partilla husi pontu vokál SEII Munisípiu Kovalima nune’e presiza partisipa ho másimu nune’e bele iha koñesimentu kona-bá igualdade jéneru no violénsia bazeia ba jéneru,” nia ko’alia iha iha salaun CAFE Ladi, kinta ne’e.
Pontu Vokál SEII Munisípiu Kovalima, Francisco de Araújo, informa informasaun ne’e importante ba alunu sira iha eskola CAFE, tanba hetan apoia husi Asosisaun Hibur Feto (AHF) Kovalima.
“Ami sosializa (sensibiliza) informasaun ida-ne’e hanesan papél husi Sekretaria Estadu Igualdade no Inkluzaun (SEII) hodi halo prevensaun violénsia bazeia ba jéneru ba feto no mane inklui grupu vulnerável sira seluk,” nia esplika.
Nia dehan, SEII la’ós foin mak partilla informasaun, maibé hanesan atividade kontinuasaun ne’ebé mak hala’o ona iha tinan kotuk iha postu Zumalai, Tilomar, Maukatar no postu administrativu sira seluk kona-bá asuntu igualdade jéneru ba autoridade lokál sira.
Tuir ajenda, SEII Iha 2026 sensibiliza informasaun igualdade Jéneru no Violénsia Bazeia ba Jéneru iha eskola sira hanesan CAFE no eskola Sekundáriu Jerál Katólika Ave Maria Suai (ESCAM).
Iha sensibilizasaun ne’e, SEII aprenzenta kona-bá igualdade bazeia ba jéneru no konvida oradór sira mai husi PNTL hodi partilla informasaun kona-bá papél PNTL-VPU, Alfela aprezenta matéria oinsa atu fó asisténsia legál atubele asesu justisa formál.
Jornalista: Celestina Teles
Editór: Evaristo Soares Martins
