DILI, 26 Marsu 2026 (TATOLI) – Governu Timor-Leste espresa nia solidariedade ho povu no Governu Repúblika Kuba hasoru impaktu sira hosi blokeiu ekonómiku, komersiál no finanseiru ne’ebé impoin hosi Estadu Unidus Amérika, ne’ebé vigora dezde dékada 1960 no agravadu iha tinan hirak ikus ne’e, ho efeitu sira ne’ebé maka’as liu iha 2026.
Apertamentu hosi medida restritiva sira, inklui aplikasaun hosi sansaun estrateritoriál sira no limitasaun sira iha fornesimentu kombustível nian, kontribui ona ba krize multidimensionál ida iha Kuba, ne’ebé marka hosi limitasaun sira iha setór enerjétiku, difikuldade sira iha funsionamentu ekonomia nian no falta hosi sasán esensiál sira. Situasaun ne’e afeta direitamente kondisaun moris populasaun nian, hodi fó impaktu ba asesu ba ai-han no sasán no servisu esensiál sira seluk.
Iha ámbitu ida-ne’e, Timor-Leste repete katak relasaun entre Estadu sira tenke hetan orientasaun hosi diálogu, respeitu ba Direitu Internasionál no prinsípiu sira ne’ebé konsagra ona iha Karta Nasaun Unida nian, inklui direitu ba dezenvolvimentu no povu sira-nia moris-di’ak.
Kuba nia apoiu no solidariedade ho Timor-Leste durante luta ba libertasaun nasionál sai hanesan baze ba relasaun kooperativa ida ne’ebé mantein dezde independénsia, notavelmente liuhosi formasaun médiku timoroan rihun ida resin iha Kuba no prezensa konstante hosi profisionál kubanu sira iha nasaun ne’e iha área sira saúde no formasaun médiku nian, no mós iha programa sira iha edukasaun no desportu.
Governu Timor-Leste hato’o nia agradesimentu ba povu kubanu ba apoiu ne’ebé fó durante tinan hirak nia laran no reafirma nia solidariedade iha kontestu atuál.
“Timor-Leste akompaña ho preokupasaun situasaun ne’ebé povu Kubanu hasoru no reafirma nia pozisaun iha defeza ba solusaun sira ne’ebé bazeia ba diálogu no respeitu ba Direitu Internasionál,” Ministru Prezidénsia Konsellu Ministru no Portavós Governu nian, Agio Pereira, afirma liuhusi nota imprensa ne’ebé Ajénsia TATOLI asesa, kinta ne’e.
TATOLI
