BAUKAU, 27 Marsu 2026 (TATOLI)–Autoridade Suku Osso-Huna, Postu Administrativu Baguia sei kontrui kampu multifunsaun liuhusi orsamentu Programa Nasionál Dezenvolvimentu Suku (PNDS).
Xefe Suku Osso-Huna, Paulo dos Reis Piedade, esplika reuniaun konsellu suku deside tinan-ne’e implementa atividade regulár konstrusaun kampu multifunsaun tanba bazeia ba ezijénsia komunidade iha-ne’ebé maioria juventude iha talentu desportu maibé durante ne’e menus fasilidade.
“Maioria juventude iha talentu maibé durante ne’e sira joga de’it iha tahu laran entaun konstrusaun kampu nu’udár parte eleva sira-nia talentu iha desportu,” Paulo Piedade hateten iha Vila Nova, Baukau, Sesta ne’e.
Paulo relata ekipa suku hamutuk ho téknika PNDS finaliza ona dezeñu no kontajen Bill of Quantity (BoQ) nune’e tuir planu kampu referidu sei kontrui iha trimestrál daruak ho totál orsamentu hamutuk $40.500, aloka ba fundu infraestrutura $34.000 no kustu operasionál $6.500.
Xefe Suku Paulo deside konstrusaun kampu desportu tanba haree ba fundu ho razaun alokasaun orsamentu PNDS tinan-ne’e kada suku iha redusaun bainhira kompara ho tinan-rua antes iha-ne’ebé besik rihun $60, enkuantu tinan-rua ikus tun ba rihun $40.
“Osan mak nune’e, atu jere ho kualidade maibé fatór distánsia no kondisaun estrada sei afeta ba kustu transporte entaun bele impaktu ba konstrusaun kampu multifunsaun,” Paulo Piedade akresenta.
Entretantu, Suku Osso-Huna hamutuk aldeia tolu kompostu husi Suku Betulari, Uaikadae no Uaibuitai ho totál populasaun 894, mane 434 no feto 460 husi uma-kain 204.
Jornalista: Natalino Belo
Editór: Xisto Freitas da Piedade
