OEKUSI, 27 Marsu 2026 (TATOLI) – Ministru Komérsiu Indústria (MCI), Filipus Nino Pereira akompaña ho tékniku sira, sesta ohin, observa konstrusaun sentru produsaun Masin, ne’ebé lokaliza iha bairru Maesmone suku Taiboko sub-rejiaun Pante Makasar, Rejiaun Administrativa Espesiál Oekusi Ambeno (RAEOA) no tuir planu, iha fulan-Maiu 2026 ne’e hahú faze prosesamentu ba kolleta.
Notísia relevante:RAEOA oferese rai ektare 10 ba MKI estabelese sentru produsaun masin
Diretór Jerál MCI, Jorge Ferreira, informa, objetivu husi vizita ofisiál ne’e, atu haree progresu serbisu tanba antes ne’e, MCI hala’o konstrusaun atu halo produsaun masin maibé atualmente seidauk bele prosesu tanba tempu udan.
Nune’e, tuir planu bainhira tempu bailoron ekipa tékniku sei kanaliza uluk tasi-been, hafoin hahú faze prosesamentu ba kolleta nian.
“Ita haree tasi-been no udan-been sei sei kahur malu hela, entaun presiza hadi’a tan fatin balun. Ne’ebé, ita sei adianta tan ba fulan-Abríl ou Maiu mak foin ita-bele haree fila-fali, katak ita-bele kanaliza ona tasi-been ba fatin ne’ebé prepara ona, hodi halo ba prosesamentu ba masin ne’e,” nia hateten iha salaun sentru produsaun Masin iha bairru Maesmone suku Taiboko, ohin.
Tanba ne’e, nia dehan, liuhusi vizita ofisiál ne’e, parte MCI observa direta estratéjia no kondisaun iha terrenu, bainhira tama ona faze produsaun labele afeta ba konstrusaun referida.
“Konstrusaun ita finaliza ona, maibé ita sei haree fila fali ba iklima ne’e, bainhira udan para ona, ita kanaliza ona bee tasi tama mai, depois ita hahú prosesamentu produsaun,” nia promete.
Notísia relevante:Governu hatuur fatuk dahuluk sentru produsaun masin iha Oé-Cusse
Iha biban ne’e, Diretór Diresaun Rejionál Komérsiu Indústria Oekusi, Orlando Quelo, reprezenta Autoridade RAEOA agradese tanba antes ne’e, autoridade atribui ona rai ho medida ektare 12 atu apoia ba sentru produsaun ne’e.
“Ha’u reprezenta Autoridade RAEOA agrdaese ba Ministériu Komérsiu no Indústria tanba bele hahú ona projetu produsaun masin iha Oekusi, tanba antes ne’e mós autoridade atribui ona rai ho nia medida ektare 12 maibé daudaun ne’e hahú uluk ho ektare ida-resin,” nia orgullu.
Notísia relevante:MCI ho lia-na’in Taiboko realiza serimónia rituál molok lansa sentru produsaun masin iha Lagoa Maesmone
Entretantu, sentru investimentu produsaun masin ne’e, Ministériu Komériu Indústria, prevee orsamentu hamutuk rihun $50-resin ba konstrusaun to’o prosesamentu kolleta.
Jornalista: Abílio Elo Nini
Editór: Rafael Ximenes de A. Belo
