OEKUSI, 30 Marsu 2026 (TATOLI) – Dezenvolve agrikultura sustentavel iha Oekusi, Autoridade Rejiaun Administrativa Espesiál Oekusi Ambeno (RAEOA) selebra akordu ho Ajénsia Internasionál World Neighbour (WN).
Diretór Jerál Rejiaun Oekusi, Domingos Punef, esklika, akordu ofisiál ne’e, nu’udar planu prioridade husi Programa Movimentu Empreendedorizmu Oekusi nian ba tinan lima hahú 2026 to’o 2030.
“Asina Mou ida-ne’e, nia objetivu atu aselera kolaborasaun entre RAEOA ho World Neighbor ba asuntu agrikultura iha Oekusi,” Diretór Jerál Oekusi, Domingos Punef, hateten iha Oekusi, ohin.
Notísia relevante:WN tulun grupu feto 27 Oé-Cusse kuda hortikultura hadi’a rendimentu família
Iha biban ne’e, Jestór Programa Ajénsia Internasionál World Neighbour, Cornelio Ase, informa, selebrasaun akordu ne’e, fokuliu ba dezenvimentu agrikultura sustentavel.
“Agradese ba eventu MoU ida-ne’e, ho nia asuntu sira sei fokuliu ba dezenvolvimentu agrikultura sustentavel ne’ebé daudaun ne’e World Neighbour hala’o ona iha Oekusi,” nia hateten.
Notísia relevante:WN-MAPPF selebra akordu hodi reforsa Projetu CRITICAL iha Bobonaro no RAEOA
Jestór ne’e esplika, durante ne’e atividade prinsipál World Neighbor iha tolu, maka agrikultura sustentavel, jestaun rekursu naturál, no kapasitasaun ba grupu agrikultura sira iha Oekusi, ne’ebé promove liu ba agrikultura sustentabilidade no proteze bee-matan sira.
“Tan ne’e ita espera katak, liuhusi selebrasaun akordu ne’e, ita bele hetan apoia serbisu ba parte World Neighbour nian no bele hametin serbisu hamutuk. Ita espera ba futuru ho MoU ne’e, autoridade RAEOA bele fó oportunidade ba Programa Movimentu Empreendedorizmu, atu bele haforsa tan grupu komunitária sira-ne’ebé ita estabelese ona iha Oekusi,” nia hateten.
Notísia relevante:Implementasaun programa WN iha Oé-Cusse hatudu rezultadu di’ak
Jornalista: Abílio Elo Nini
Editór: Rafael Ximenes de A. Belo
