DILI, 30 Marsu 2026 (TATOLI)-Prezidente Parlamentu Nasionál, Maria Fernanda Lay, husu ba komisaun espesializada permanente sira atu redús atividade fiskalizasaun bá munisípiu sira, tanba folin kombustivel sa’e ne’ebé kauza husi funu iha Médiu Oriente.
Líder másima husi órgaun lejizlativa ne’e alerta katak sei autoriza de’it komisaun ida halo fiskalizasaun iha terrenu fulan ida dala-ida. Nia mós fó ezemplu katak tanba impktu husi funu ne’e país balun halo serbisu husi uma, tanba mina laiha.
“Ita-nia orsamentu ita aprova [ki’ik], mina nia folin sa’e, iha implikasaun. Tanba ha’u haree fiskalizasaun mai ne’e maratona fulan tomak. Ha’u husu ba komisaun analiza saida mak urjente, tanba iha mekanizmu seluk, bele bolu Governu mai hatán iha plenária, para uitoan ba munisípiu”, nia fó sai iha reuniaun plenária Parlamentu, ohin.
Notísia relevante: https://tatoli.tl/2026/03/25/governu-aprova-medida-temporaria-ba-estabilizasaun-folin-kombustivel-garante-abastesimentu/
Fernanda Lay aviza ba komisaun sira atu halo sensibilizasaun ida-ne’e iha komisaun idaidak. “Tanba horsehik iha pedidu ba semana oin nian, ha’u riska fó ida de’it, ne’ebé ba iha Prezidente Komisaun la ko’a, to’o iha ha’u ko’a, ne’ebé aviza kedas. Favór ita hothotu iha sensibilidade ba krize mundiál”, nia hato’o.
Antes ne’e, Prezidente Parlamentu Nasionál, Maria Fernanda Lay, husu deputadu sira atu hamenus viajen bá rai-li’ur ne’ebé la nesasáriu hodi halo poupansa ba orsamentu Estadu tanba ho preokupasaun presipísiu fiskál.
Presu mina iha postu abastamentu ETO iha Hali-Laran no Fatuhada, gazolina antes $1.09, agora sa’e ba $1.19, enkuantu gazóleu $1.19 sa’e ba $1.3. Iha sentru abastamentu ETO Mandarin, gazolina antes $1.12 agora sa’e ba $1.23, gazóleu $1.23 sa’e ba $1.35.
Notísia relevante: https://tatoli.tl/2026/03/24/fernanda-lay-husu-deputadu-sira-hamenus-viajen-ba-rai-liur-hodi-halo-poupansa/
Jornalista: Nelson de Sousa
Editora: Maria Auxiliadora
