DILI, 09 Abríl 2026 (TATOLI)–Tribunál Judisiál Primeira Instánsia Dili (TJPID), Kinta ne’e, halo interrogatóriu judisiál dahuluk ba arguidu FXC ne’ebé sona ema na’in-haat hodi rezulta labarik tinan-hitu mate no ema na’in-tolu seluk kanek grave, iha área Beto, Suku Madohi, Postu Administrativu Dom Aleixo, Munisípiu Dili, iha Segunda (06/04).
Polísia Eskudra Dom Aleixo lori arguidu FXC bá aprezenta iha Tribunál iha tuku 10:00 ho kondisaun ne’ebé grave, nia oin sira sofre pankada no ain la’o ladún di’ak tanba vítima nia família sira halo asaun hasoru arguidu.
Maibé, arguidu kontinua la’o no Autoridade Seguransa lori to’o iha sala julgamentu laran nune’e prosede ba interrogatóriu dahuluk.
Ministériu Públiku (MP) ne’ebé repzenta husi Prokuradór Hernani Rangel promove arguidu ho krime tolu hanesan, omesídiu simples ne’ebé previstu iha artigu 139 husi Kódigu Penál Timor-Leste, tentativa omesídiu ne’ebé previstu no punivél iha artigu 138 husi Kódigu Penál no krime arma branka tuir rejime jurídiku prátika arte marsiál no arma branka husi lei númeru 5/2017.
Notísia relevante : Sidadaun suspeitadu moras mentál sona ema na’in-haat iha Komoro kapturadu no detein ona iha sela
Nune’e, iha MP nia alegasaun, Prokuradór Hernani Rangel solisita ba Tribunál atu aplika Prizaun Preventiva ba arguidu.
Durante entrevista, Defeza husi arguidu FXC, Defensór Públiku José da Silva, hateten, hanesan Defeza konkorda ho MP nia alegasaun atu asegura arguidu hodi hein prosesu investigasaun tuir mai, tanba antes ne’e vítima nia família sira baku arguidu to’o alezadu.
“Ha’u haree ba kondisoes ne’ebé mak iha provizóriu nia bá prizaun. Iha alegasaun Ministériu Públiku no parte Defeza nia mak ne’e imposível nia atu hela livre iha li’ur tanba nia kondisaun balun ita hatene primeiru ema mate segundu nia deklara katak ema baku nia todan,” nia katak.
José dehan, nu’udar meiu ida atu asegura pesoál ida nia vida rasik mak tau nia iha Prizaun Preventiva hodi hein relatóriu médiku.
Orsida iha MP nia desizaun sei aprezenta relatoriu médiku ba Tribunál kona-ba nia moras mentál.
Iha interrogatóriu dahuluk, arguidu rekoñese nia hahalok ne’ebé nia halo no labele hatan Tribunál nia perguntas balun.
“Iha primeiru interrogatóriu, arguidu deklara kona-ba nia naran no iha buat balun ba perguntas ne’ebé mak iha Tribunál, arguidu ko’alia de’it nia moras ne’e mosu no kona-ba sona ema iha parte balun nia rekoñese katak nia sona duni ema no ema baku nia maibé iha perguntas nia la hatene, no ita nota katak iha sinais nia moras mental. Agora hatene rezultadu di’ak ne’e iha relatóriu mak ita foin hatene katak nia moras mentál ka nia kesurupan iha momentu ruma mak mosu hanesan ne’e,” nia informa.
Hafoin rona tiha parte hotu iha alegasaun, Tribunál liuhusi Juiz José Escurial suspende prosesu interrogatóriu dahuluk ne’e ba parte lorokraik tuku 16:00 hodi hasai despaixu.
Jornalista : Natalino Costa
Editora : Julia Chatarina
