DILI, 15 Abríl 2026 (TATOLI)—Polísia Nasionál Timor-Leste (PNTL) Munisípiu Dili liuhusi Seksaun Investigasaun Kriminál (SIK) ne’ebé apoia husi Diresaun Servisu Investigasaun Kriminál (DSIK) Nasionál, tersa (14/04) ne’e, ezekuta mandadu judisiáriu husi Tribunál Judisiál Primeira Instánsia Dili ho Númeru Úniku Kazu (NUC) 0010/24.CVTDD, hodi hala’o apreensaun ba autokarru ida ho númeru matríkula 59.240 ne’ebé Federasaun Futeból Timor-Leste uza.
Apreensaun ne’e iha ligasaun ho kazu dívida husi estrutura FFTL sesante iha 2021 to’o 2024, bainhira lideransa FFTL sesante trata viajen selesaun nasionál sira atu partisipa iha kompetisaun internasionál no sosa billete aviaun husi COFY Agency, maibé to’o ohin loron seidauk selu.
“Motivu husi apreensaun ne’ebé PNTL sira halo ba karreta FTL nian ne’e, relativamente ho dívida ne’ebé mak estrutura anteriór ne’ebé lidera husi Francisco Jerónimo ho Gregório Correia. Dívida kona-ba billete aviaun ho empreza COFY Agency, sira lori malu to’o Tribunál, empreza ne’e manán tiha, sira promete atu selu maibé selu de’it sorin no sorin balu seidauk selu,” Adjuntu Sekretariu Jerál FFTL, Fernando Baptista, hateten ba Agência TATOLI iha edifisiu FFTL, ohin.
Bainhira empreza manán iha tribunál, nia dehan, tribunal fó kedan despaixu atu halo peñor ba veíkulu sira nu’udar garantia ba prosesu legál tuir mai, no veíkulu sira-ne’ebé hetan mandadu peñor mak Mini Bus ho xapa matríkula A-23-567-TL, Autokarru ho xapa matríkula 59-240-TL.
Nia hatutan, asaun husi ekipa DSIK ne’e parte ida husi prosesu legal ne’ebé la’o hela atu klarifika responsabilidade ba dívida sira-ne’ebé estrutura sesante sira halo durante mandatu.
Tanba kazu ne’e seidauk rezolve, nia hatutan, tribunál foti desizaun atu halo apreensaun ba bus FFTL ida no autoridade sira sei kontinua buka mini bus ida seluk nia paradeiru.
Kareta bus FFTL ne’ebé autoridade sira apreensaun ona, agora submete ba Komandu PNTL Munisípiu Dili hodi hein prosesu legal tuir mai.
Dívida ne’ebé FFTL halo ho empreza COFY Agency hamutuk rihun $500, maibé estrutura sesante konsege selu ona rihun $300-resin maibé falta rihun $100-resin.
“Dívida ne’e ami mós lahatene tanba ami tama mai ne’e, iha tinan 2025 laiha Heand Over ba ida-ne’e, ami sente ida-ne’e hanesan supreza bainhira despaixu ne’e tun. Momentu ne’ebá, ami informa kedan ba Ezekutivu FFTL nian, bolu na’in ba empreza mai ko’alia atu fó tempu ami husu informasaun, maibé empreza dehan hein kle’ur demais ona ne’ebé la’o tuir de’it prosesu tribunál nian,” nia dehan.
Tuir informasaun ne’ebé estrutura atuál hetan husi estrutura sesante iha duni dívida maibé ho Roman Travel hamutuk rihun $300 no FFTL komunika ho Asian Football Confederation (AFC) ho Federation International Football Asosiation (FIFA) konsege selu ona.
“Ida ami lahatene ne’e desizaun tribunal, ami prontu koopera hodi halo fali rekursu ruma. Ami mós sei buka advogadu ida hodi haree asuntu ne’e,” nia hateten.
Notísia Relevante: Polísia halo apreensaun ba karreta FFTL
Jornalista : Hortêncio Sanchez
Editór : Cancio Ximenes
