OEKUSI, 15 Abríl 2026 (TATOLI) – Ospitál Referál Rejiaun Administrativa Espesiál Oekusi Ambeno (RAEOA), kuarta ohin, benefísia mákina raiu-X husi Ministériu Saúde (MS) liuhusi Diresaun Nasionál Ekipamentu Médiku, hodi tulun serbisu saúde.
Notísia relevante:PM Xanana vizita pasiente no observa fasilidade inklui ai-moruk iha Ospitál Oekusi
Diretora Nasionál Ekipamentu Médiku MS, Luduvina da Costa Cruz, funsionamentu husi mákina raiu-X ne’e, atu halo diagnóstiku no deteta moras sira, hanesan Tuberkuloze (TBC), pulmaun no moras seluktan.
“Makina raiu-X ne’e ita apoia hodi haree ba nesesidade pasiente sira-nian, tanba RAEOA do’ok husi nasionál, entaun bainhira pasiénte iha, tenke halo transferénsia, tan ne’e atu evita ida-ne’e, Ministériu Saúde, koordena ho serbisu saúde Oekusi buka solusaun atu rezolve problema ne’ebé ospitál Oekusi infrenta,” nia hateten iha Ospitál Referál Oekusi, ohin.
Notísia relevante:Saúde Oekusi hala’o akampamentu triajen masál no konsulta espesialidade iha Oesilo
Diretór Ezekutivu Ospitál Referál Oekusi, Manuel da Cunha, agradese tanba mákina raiu-X ne’ebé utiliza iha Ospitál Referál Oekusi avária kle’ur ona dezde 2015, nune’e bainhira deteta pasiente ho moras króniku obrigatóriu tenke transfere ba Hospitál Nasionál Guido Valadares (HNGV).
“Ita koordena ho Ministériu Saúde liuhusi karta hodi ejize nafatin, to’o ohin bele hetan ona solusaun, tanba mákina referida, bele halo atendimentu movél,
ba postu saúde no sentru saúde sira iha nivél suku no postu administrativu sira, ne’e mak ita agradese tanba solusiona ita-nia problema iha Ospitál Referál Oekusi, ho razaun fundamentu, bainhira pasiente mai, sei ita la atende tanba mákina avária, automatikamente, tenke transfere ba nasionál, ne’ebé pasiente barak enfrenta problema barak iha prosesu transferénsia,” nia orgullu.
Notísia relevante:Hafoin konsulta, Pasiente 100-resin iha Oekusi sira-nia matan konsege rezolvidu
Entretantu, hafoin Ministéru Saúde oferese, ekipa tékniku sei fasilita formasaun ba profisionál saúde sira iha Ospitál Referál Oekusi, nune’e bele utiliza ho responsabilidade hodi garante atendimentu seguru ba pasiente sira.
Jornalista: Abílio Elo Nini
Editór: Rafael Ximenes de A. Belo
