DILI, 16 Abríl 2026 (TATOLI)—Servisu Rejistrasaun no Verifikasaun Emprezariál, Institutu Públiku (SERVE, I.P) ezekuta ona Orsamentu Jerál Estadu (OJE) 2026 iha trimestre dahuluk (Janairu-Marsu) ne’e atinje 21%, husi totál orsamentu ba despeza nian hamutuk $340.302.50.
Diretór Ezekutivu Interinu SERVE, I.P, Hélio da Costa, informa despeza ka gastu ba trimestre dahuluk iha SERVE ne’e, barak liu ezekuta ba saláriu vensimentu hodi selu ba funsionáriu ne’ebé kobre territórriu (inklui sukursal sira) hamutuk 315.
“Funsionáriu sira-ne’e barak liu mak kontratadu ho termu sertu no funsionáriu permanente iha na’in-tolu ne’e destakadu husi Ministériu Justisa, hodi presta ba servisu konservasaun legalidade maibé sira hetan saláriu husi Ministériu Justisa,” Diretór Interinu ne’e informa ba Agência Tatoli iha nia kna’ar fatin, Matadoru, ohin.
Iha trimestre dahuluk hahú husi fulan-Janeiru to’o Marsu ne’e, SERVE konsege rekolla reseita hamutuk $136.401, liuhusi envolvimentu operasionál komersiál hanesan pedidu ba renovasaun, pedidu ba alterasaun legaliza no reemprime dokumentu.
“Reseita barak-liu mak iha atividade ba pedidu lisensiamentu liuliu ba servisu liña sektorál, tanba bazeia ba dekretu-lei nú. 83/2022 kona-ba aplika envolvimentu nian ho montante $60, entaun kliente sira ne’ebé hato’o pedidu mai iha SERVE sei verifika nia klasifikasaun hodi aplika tuir lei ne’e rasik,” nia esplika.
Entretantu, Orsamentu Jerál Estadu 2026 ne’ebé aloka ba SERVE, I.P hamutuk $1.571.600.00, ne’ebé kompostu husi kategória tolu mak saláriu vensimentu hamutuk $1.226.762.00, bens servisu $319.838.00 no kapitál menór prevee $25.000.00.
Jornalista : Alexandra da Costa
Editór : Cancio Ximenes
