DILI, 16 Abríl 2026 (TATOLI)—Diretór Timor Resources, Christopher Moyes, akompañadu husi Antigu-Ministra Negósiu Estranjeiru Austrália, Julie Bishop, hala’o enkontru ho Prmeiru-Ministru, Kayrala Xanana Gusmão, hodi diskute no atualiza kona-ba prosesu atu halo esplorasaun mina no gás ba faze daruak iha Timor-Leste.
Notísia Relevante: Timor Resources prepara ona ekipamentu halo perfurasaun mina Feto Kmaus II iha Kovalima
Diretór Timor Resources, Christopher Moyes, hateten iha implementasaun faze dahuluk nian sira konsege halo ona perfurasaun ba posu mina tolu iha rai-maran liuliu iha área Suai-Kovalima nian.
“Agora ami hakarak avansa husi esplorasaun ba faze avaliasaun no dezenvolvimentu, nune’e ohin ami hetan ona oportunidade hasoru malu ho Primeiru-Ministru Xanana no fahe ami-nia entuziazmu ba projetu ne’e no nia apoiu hodi avansa ba oin, ba ami-nia kompañia nia benefísiu no mós ba benefísiu Timor-Leste nian,” Diretór Timior Resources, Christopher Moyes, informa ba jornalista sira iha Palásiu Governu, ohin.
Tanba ne’e, nia dehan, ohin nia ho Diretór-jestor Interinu ba projetu ne’e, ne’ebé responsável ba operasaun, Chris McCown mai halo sorumutu ho Xefe Governu, no durante enkontru Primeiru-Ministru mós iha inisiativa apoiu no eleva projetu ne’e ba faze tuir mai hodi fornese enérjia ba povu Timor-Leste.
“Ha’u hanoin Primeiru-Ministru haree ami-nia projetu hanesan buat ne’ebé importante tebes. Buat ida-ne’ebé bele akontese iha futuru, tanba ne’e ha’u hanoin nia apoia tebes buat ne’ebé ami koko atu halo. Nia enkoraja reguladór ministériu oioin iha Timor atu servisu hamutuk ho ami hodi hetan rezultadu ne’ebé susesu,” nia haktuir.
Nia hatutan, sira hein atu halo perfurasaun ba posu adisionál sira iha rai-maran, kona-ba dezenvolve rezerva mina-rai nomós rezerva gás nian iha Timor-Leste liuliu iha fatin potensiál sira.
Notísia Relevante: Timor GAP no Timor Resource iha ona entendimentu ba dezenvolvimentu kampu petrolíferu rai-maran
Jornalista : Alexandra da Costa
Editór : Cancio Ximenes
