DILI, 16 Abríl 2026 (TATOLI)—Primeiru-Ministru, Kay Rala Xanana Gusmão, kinta ne’e, hasoru malu ho Prezidente Repúblika José Ramos-Horta hodi atualiza kona-ba rezultadu virtuál meating ho Prezidente Sierra Leone.
Asuntu prinsipál rua ne’ebé líder na’in-rua diskute iha enkontru virtuál ne’e mak primeiru atu esplora no buka dalan liuhusi diskusaun ho enkuadramentu ida hodi hasa’e envolvimentu g7+ nian iha apoiu Estadu membru sira ba harri pás, estabilidade no konsolidasaun demokrátika no segundu mak diskute no aseita estabelesimentu relasaun bilaterál entre Timor-Leste ho Sierra Leone.
Diskusaun kona-bá haforsa pás no estabilidade iha país membru g7+ hamosu pontu importante tolu mak primeiru esplora kona-ba posibilidade iha inisiativa apoia konjunta, segundu konsiderasaun kona-bá misaun konjunta bá Guiné-Bissau no Sudaun Súl no terseiru kria akordu no mekanizmu atu fasilita diálogu, mediasaun no diplomasia preventiva.
“Ha’u informa ba Prezidente Repúblika kona-ba enkontru virtuál ne’ebé foin lalais halo ho Prezidente Sierra Leone tanba sira mak agora Prezidénsia ba g7+, lema g7+ nian mak ‘Godbye Conflict, welcome development’. Husi ne’e ita buka malu atu rezolve problema polítiku kona-ba falta demokrasia, falta responsabilidade direitu umanu, ida-ne’e mak atan ha’u informa ba Prezidente,” Xanana hateten ba jornalista sira hafoin ramata enkontru semanál ho Xefe Estadu iha Palásiu Prezidensiál Nicolau Lobato, Bairru Pite.
Xanana dehan, Sierra Leone uluk mós enfrenta difikuldade hanesan Estadu frázil maibé konsege ultrapasa tiha no agora daudaun asume Prezidénsia g7+.
Nia hatutan, enkontru virtuál ne’e, ko’alia mós kona-ba Giné-Bissau ne’ebé iha tinan 2014 Timor-Leste haruka ekipa ida bá ajuda sira no iha istória hakerek katak, depois tinan 40 ba dahuluk iha 2014 mak Giné-Bissau realiza eleisaun ne’ebé livre no demokrátiku.
Ne’e tanba Timor-Leste mak fó apoiu hodi ajuda iha parte hotu-hotu hanesan estabelesimentu STAE, CNE, sosa ekipamentus maibé ikus-mai mosu fali problema tanba laiha demokrasia.
Xefe Governu haktuir, Giné-Bissau ne’ebé la rekoñese Timor-Leste nune’e liuhusi organizasaun g7+ sei ba hodi ajuda realiza diálogu ho parte hotu-hotu atu bele hadi’a fila-fali demokrasia ne’ebé laiha ona. Aleinde ne’e, Sudaun Súl nu’udár nasaun joven hanesan mós Estadu membru g7+ no daudaun haree malu la di’ak.
Dadaudaun ne’e, Sierra Leone defísil tebe-tebes, tanba ne’e nu’udár membru g7+ hotu-hotu espresa hakarak atu buka solusaun liuhusi aprosimasaun atu halo diálogu, halo rekonsiliasaun nune’e povu bele moris hakmatek tanba tinan hirak nia laran ema barak mate, tanba hamlaha, kilat musan no moras oioin.
“Iha enkontru ne’e, Prezidente Sierra Leone dehan, sei esforsu hodi buka dalan atu sai husi problema ne’e,” Xanana tenik.
Enkontru virtuál ne’e akompaña husi Ministru Negósiu Estranjeiru no Kooperasaun (MNEK), Bendito dos Santos Freitas ho Sekretáriu Jerál g7+,” Helder da Costa dehan.
Jornalista : Hortêncio Sanchez
Editór : Cancio Ximenes
