DILI, 21 Abril 2026 (TATOLI)—Diretór Servisu Asistensia Klinika Hospitál Nasional Guido Vladares (HNGV), Eligio A. de A.Soares, hateten Ministru Ensinu Superiór Siénsia no Kultura (MESSK), José Honório da Costa Pereira Jeronimo, hakotu iis tanba sofre kardiaka hafoin to’o iha Hospitál Nasionál Guido Valadares (HNGV).
Notísia Relevante: Ministru José Honório hakotu iis
“Ministru Ensinu Superiór Siénsia no Kultura ne’ebé hakotu iss iha oras rua ka tolu liu ba. Tuir kronolojia, família lori Ministru José Honório to’o iha HNGV ne’e ho kondisaun iis laiha ona. Signifika katak iis laiha antes to’o iha ospitál. Maske kondisaun hanesan ne’e maibé ekipa emerjénsia ho médiku sira, halo esforsu tomak atu halo prosedimentu sira-ne’ebé mak normalmente iha, banhira pasiente iis laiha ona. Entaun, ami sempre halo mak resositasaun ba kardiopulmonar,” Eligio A. de A.Soares hateten ba jornalista sira, iha nia kna’ar fatin HNGV, Bidau, ohin.
Nia esplika, familia sira lori ministru mai iha HNGV iha oras 13h55 depois ekipa emerjénsia nafatin halo ninia kna’ar no buka fila-fali fuan ne’ebé mak para ona no tenta atu halo ativu fila-fali fuan, entaun sira konsege halo resositasaun kardiopuulmonár ne’e, depois sira xoke fuan durante minutu 25 nia laran maibé la konsege, entaun deside hapara no repete fila-fali eletrokardograma katak fuan nafatin para no la funsiona.
“Iha ninia istória ne’ebé mak médiku sira rekolla katak ministru ne’e antes sofre moras tensaun aas no durante ne’e hemu ai-moruk ladun regular. Ministru mós ladun kontrola nia moras tensaun ne’ebé mak durante ne’e iha. Entaun, husi parte médiku nian, posibilidade ministru ataka kardiaka ne’ebé mak ita rekolla informasaun husi familia katak minsitru hakotu iis depois minutu 30 iha servisiu fatin. Entaun, husi parte médiku nian, Minsitru ne’e posibilidade ataksaun fuan, kauza mós husi tensaun ne’ebé mak la kontrola ho di’ak,” nia dehan.
Iha sorin seluk, Sekretáriu Estadu Floresta, Fernandino Vieira da Costa, sente triste tanba ema hotu la espera no fó sai iha mídia sosiál katak Ministru Ensinu Superiór hakotu iis ona.
“Durante ne’e nia hala’o servisu hanesan baibain hodi halo servisu hanesan Ministru Ensinu Superiór no ita la hareee nia moras, tanba nia hala’o servisu hanesan baibain no hanesan membru Governu. Nia mós hanesan asume kargu iha partidu Demokrátiku hanesan Prezidente Partidu Demokrátiku Munisípiu Likisá nian, maibé ita hotu sente triste. Ida-ne’e mak disizaun Maromak nian,” nia dehan.
Nia informa, ajenda ne’ebé mak iha maibé seidauk fixu normalmente sei lori ba Ministériu Edukasaun, Ministériu Ensinu Superiór depois lori ba iha sede Partidu Demokrátiku, maibé ajenda tuir mai tan depois mak fó sai tanba sei lori tan ba nia rezidénsia iha Munisípiu Likisá.
Tuir observasaun Jornalista TATOLI iha terenu nota katak hafoin Ministru Ensinu Superiór Siénsia no Kultura hakotu iis to’o iha Hospitál Nasionál Guido Valadares hetan vizita husi Primeiru-Ministru, Membru Parlamentu Nasionál, Membru Nuno Governu Konstitusionál, Sosiedade Sivil, Akademista, Kolega no mós familia husi Ministru Ensinu Superiór Siénsia no Kultura.
Biografia
José Hónorio da Costa Pereira Jerónimo moris iha Bazartete, Munisípiu Likisá, iha 15 Fevereiru 1973.
Iha loron 01 fulan-Julhu tinan 2023, José Hónorio simu pose hanesan Ministru Ensinu Superiór, Siénsia no Kultura iha Governu Konstitusionál IX RDTL, ho responsabilidade ba dezeña, ezekusaun, koordenasaun no avaliasaun polítika ba área ensinu no kualifikasaun nivel superiór, nomós ba área siénsia no teknolojia.
Hanesan ministru, José Hónorio lidera inisiativa importante sira iha setór ensinu superiór liuliu aprovasaun Lei Bazes Ensinu Superiór, ne’ebé aprova husi Konsellu Ministru iha Fevereiru 2024 no husi Parlamentu Nasional iha Juñu 2024.
Nia mós lidera agenda kooperasaun internasionál ne’ebé ativu, ho objetivu atu estabelese parcería ba bolsa estudu no programa formasaun ba estudante no tékniku timoroan sira.
Antes asume kargu nu’udar ministru, José Honório hala’o servisu hanesan dosente iha Universidade Nacional Timor Lorosa’e (UNTL).
Iha tinan 2001, nia hetan grau lisensiatura iha Estudu Dezenvolvimentu iha Instituto de Tecnologia e Ciências Mandala iha Indonézia, no remata kursu Mestradu iha Estudu Dezenvolvimentu iha Universitas Kristen Satya Wacana, Salatiga (Indonézia) iha tinan 2010.
Iha 2001 ne’e kedas, José Hónorio hanesan dosente iha Faculdade Ekonomia iha Departamentu Ekonomia no Estudu Dezenvolvimentu iha Universidade Nacional Timor Lorosa’e (UNTL).
Iha UBTL, José Hónorio assume kargu oioin mak hanesan Xefe Departamentu Ekonomia no Estudu Dezenvolvimentu (2004-2006), Dekanu Fakuldade Economia (2006-2008), Vise-Dekanu Asuntu Estudante sira iha Fakuldade Ekonomia no Jestaun (2011-2013), Pró-Reitor Administrasaun, Planeamentu no Finansa (2016-2020) no Pró-Reitor Inspesaun, Auditória no Kontrolu Kualidade (2021-2023).
Ministru José Hónorio mós sai hanesan membru Konsellu Jerál UNTL iha períodu 2015 to’o 2016.
Iha 2013-2015, José Hónorio hala’o funsaun hanesan Adidu Komérsiu iha Embaixada Repúblika Demokrátika Timor-Leste iha Jakarta, Indonézia.
Iha tinan 1994, José Hónorio sai membru organizasaun estudantil ne’ebé hanaran “Resisténsia Nasional Estudante Timor-Leste” (RENETIL), ne’ebé funda iha tinan 1988 husi estudante timoroan sira iha Indonézia ho objetivu atu luta ba independénsia Timor-Leste.
Notísia Relevante: Ministru José Honório nia entrevista ikus iha Hera: Agradese ba Japaun nia apoiu ba Fakuldade Enjeñaria
Jornalista : Felicidade Ximenes
Editór : Cancio Ximenes
