BAUKAU, 21 Abríl 2026 (TATOLI)—Tékniku operadór hamutuk na’in-50 partisipa treinamentu kona-ba instalasaun, utilizasaun, operasaun no planta oksijéniku (PSA) iha Ospitál Rejionál Eduardo Ximenes (HoREX-sigla portugeza) Baukau.
Diretór Apoiu Diagnóstiku no Terapéutiku HoREX, Alcino Timótio Gaio esplika treinamentu referidu hala’o durante loron-lima ho objetivu atu hasa’e koñesimentu funsionáriu ligadu ho oksijéniu iha-ne’ebé hala’o husi parseiru dezenvolvementu Atlas Capco no hetan apoia husi kooperasaun entre Ministériu Saúde (MS) no UNICEF Timor-Leste.
“Ita foku ba treinamentu ba tékniku sira. Husu atu tékniku sira tau-atensaun fó tempu atu aprende ho di’ak husi Atlas Copco nune’e entrega ita bele utiliza no halo operasaun ho didi’ak,” Alcino Gaio hateten bainhira abertura treinamentu iha Sentru Saúde Tirilolo Vila Antiga, Tersa ne’e.
Alcino Gaio relata treinamentu referidu bainhira finaliza sei atinje pontu tolu hanesan instalasaun planta oksijénika, métudu utilizasaun no operasaun mezmu atuál fatin oksijéniu iha HoREX Baukau seidauk utiliza tanba kondisaun ne’ebé sei menus hanesan infraestrutura no fasilidade.
Aleinde ne’e, ho treinamentu ne’e parte preparasaun iha-ne’ebé bainhira kooperasaun entre Atlas Capco ramata ho durasaun tinan-rua mai tékniku sira bele hala’o operasaun rasik ba oksijéniu iha HoREX antes distribui ba sentru internamentu iha parte leste.
“Agradese ua’in ba parseiru UNICEF ne’ebé apoia HoREX Baukau atu instala oksijéniu hodi utiliza ba tempu naruk,” Alcino Gaio akresenta.
Iha fatin hanesan, Diretora Jerál Interina Serbisu Ospitalár, Santina Gomes hateten kooperasaun UNICEF hala’o iha tinan 2023 bainhira Timor-Leste hasoru pandemia Covid-19 ho objetivu asegura oksijéniu iha HoREX Baukau durante oras 24.
“HoREX Baukau sai sentru rejionál iha leste nune’e planta ne’e sei asegura fornsesimentu oksijéniu ba Munisípiu Lautein no Vikeke,” Santina Gomes hateten.
Nia rekoñese durante tempu naruk oksijéniu transporta husi nasionál hodi halo atendimentu ba pasiente sira iha HoREX Baukau ne’ebé presiza duni atu halo instalasaun planta nune’e asegura pasiente sira bainhira hasoru situasaun emerjénsia.
Enkuantu, Deputy Representative UNICEF Timor-Leste, Teija Vallandingham hateten nu’udár parseiru sei nafatin iha kompromisu atu apoia MS liuliu kobertura ba pasiente ho kategoria labarik nune’e iha tinan 2025 deside kompara ekipamentu planta oksijénika, konstrui uma, treinamentu utilizasaun no garante manutensaun ho durasaun tinan rua iha HoREX Baukau.
Partisipannte na’in-50 ne’ebé tuir treinamentu referidu maihusi munisípiu haat kompostu husi Vikeke, Lautein, Tékniku Nasionál Dili no Baukau, enkuantu iha munisípiu Baukau totál tékniku operadór oksijéniu hamutuk na’in-sanulu (10).
Jornalista: Natalino Belo
Editór: Xisto Freitas da Piedade
