DILI, 23 Abríl (TATOLI) – Primeiru-Ministru, Xanana Gusmão, informa katak Rejiaun Administrativa Espesiál Oekusi Ambenu (RAEOA) sei atrazada iha prosesu preprasaun atu simu desentralizasaun no podér lokál.
Deklarasaun ne’e bazeia ba avaliasaun kondisaun mínima iha munisípiu sira, ne’ebé Governu halo daudaun hodi haree prontidaun kada área atu implementa autonomia Governu lokál.
Nia esplika katak prosesu desentralizasaun la’o hela iha munisípiu hotu, ho objetivu atu identifika área sira ne’ebé presiza korrije no hametin, atu prepara di’ak antes simu autonomia Governu lokál.
“Governu lokál la’ós de’it atu simu kargu, maibé atu serbisu nu’udar Governu, ne’ebé sei iha eleisaun asembleia munisipál ho setór hothotu”, Xanana hateten iha Palásiu Prezidensiál Bairu Pité, Dili.
Maski nune’e, Xefe Governu subliña katak Oekusi atrazadu liu tanba tinan 10-resin, Prezidente Autoridade mak deside hotu. “Buat ida la to’o ba kraik, iha kraik ita husu sira la hatene tanba iha ne’ebá desizaun ema ida nian de’it”, nia dehan.
Primeiru-ministru salienta katak sistema finanseiru iha RAEOA mós seidauk tuir regra ne’ebé aplika iha Timór tomak. Tanba ne’e, Governu deside envolve Ministériu Finansa, Ministériu Administrasaun Estatál, Ministériu Obra Públika, Ministériu Planeamentu no Investimentu Estratéjiku, no Ministériu Saúde atu halo avaliasaun no prepara didi’ak rekursu umanu kompetente atu kaer área hothotu ne’ebé funsiona iha ne’ebá.
“Nune’e ha’u informa ba Prezidente katak depoizde halo tiha tranzisaun iha ne’ebá ne’e estrutura ne’ebé ami nomeia tranzitóriu hotu, ne’ebé horisehik ezonera hotu fali. Ohin Ministru Administrasaun Estatál Tomás Cabral fó pose ba estrtutura foun no Prezidente mak nafatin Régio da Crúz”, Xanana realsa.
Nia esplika katak estrutura foun ne’e sei sejeita ba avaliasaun tuir rezolusaun hateten tinan ida no bainhira la hatudu dezempeña di’ak, sei substitui.
Iha 22 Abríl, Konsellu Ministru aprova ona projetu Rezolusaun Governu ne’ebé aprezenta husi Ministru Administrasaun Estatál, Tomás do Rosário Cabral, kona-ba ezonerasaun no nomeasaun foun ba dirijente servisu iha Rejiaun Administrativa Espesiál Oekusi Ambenu (RAEOA).
Ho rezolusaun ida-ne’e, Diretór-Jerál Rejionál no Diretór Rejionál sira ne’ebé hala’o hela funsaun hetan ezonerasaun, no Régio da Cruz hetan nomeasaun nu’udar Prezidente RAEOA.
Nomeia mós Sekretáriu Rejionál sira maka hanesan Salvador da Cruz, ba Administrasaun no Finansa, Francisco Loca, ba Planeamentu no Dezenvolvimentu, no mós Merita Marques Lafo, ba Asuntu Sosiál no Organizasaun Komunitária no diretór servisu rejionál sira seluk.
Titulár kargu sira ne’e sujeita ba avaliasaun dezempeñu anuál, no simu klasifikasaun ne’ebé la satisfatóriu sai baze hodi ezonera sira.
Notísia relevante: Régio Salu retoma hikas funsaun nu’udar Prezidente Autoridade RAEOA
Jornalista: Arminda Fonseca
Editora: Maria Auxiliadora
