DILI, 24 Abríl 2026 (TATOLI)—Institutu Jestaun Ekipamentu Apoiu Dezenvolvimentu Infraesturtura (IGEADI), hahú husi Janeiru to’o Marsu 2026 ne’e, simu pedidu normalizasaun infraestrutura estragadu iha territóriu hamutuk 76.
“Pedidu ba normalizasaun infraestrutura hamutuk 76 ne’e no konsege rezolve 43, enkuantu seluk ne’ebé la rezolve tanba kompañia mak normaliza. Seluk tan ne’ebé labele normaliza permanente mak ponte Bulobu iha Kailaku nian, entaun sira ba apoiu provizóriu de’it,” Prezidente IGEADI, Ana Paula da Cruz, informa ba Agência Tatoli liuhusi telefónik, ohin..
Iha tinan kotuk, IGEADE monta ona zumbu maibé udan tun bee lori tiha, entaun agora daudaun monta fali kontentór ense rai-henek iha laran, atu provizoriamente uza tanba bee nia velosidade boot.
“Ita mós tenke kuidadu mákina labele tama se lae bee bele lori. Maske komunidade la kontente, maibé ami labele rezolve ho lalais tanba udan boot. Hafoin bee nia velosidade tun mak foin ami bele rezolve no agora ponte ne’e bele uza ona,” nia dehan.
Husi pedidu hirak ne’e, kobre husi territóriu nasionál no pedidu ne’e jeralmente husi komunidade, autoridade, ema individu, eskola, igreja no pedidu hirak ne’e kategória ba morru protesaun, estrada, drainajen, rezidénsia, edifísiu, sedimentasaun no ponte.
“Kualker ema bele halo pedidu mai ami halo identifikasaun hotu ami orienta tékniku sira ba halo levantamentu dadus hodi define mákina ne’ebé presiza atu utiliza, utiliza mina no durasaun tempu. Nune’e, iha trimestre dahuluk ne’e, ami konsege poupa orsamentu hamutuk $1,8 ho servisu hirak ne’e,” nia esplika.
Pedidu hirak ne’e la selu tanba sira hanesan institutu Governu entaun IGEADI hamri’ik atu apoiu povu bainhira hetan inundasaun ruma, enkuantu setór privadu selu bainhira sira hakarak utiliza (aluga) mákina maibé tempu udan hanesan ne’e sira labele fó tanba atu rezerva ba apoiu emerjénsia.
“Signifika pedidu husi komunidade la selu, maibé setór privadu sira selu bainhira aluga no nia montante depende ba tipu mákina,” nia dehan.
Nia hatutan, kona-ba sedimentasaun sira iha sidade Dili antes ne’e nia orienta ona ekipa ba hasai hotu, sedimentasaun ida agora ne’e tanba foin udan no iha Kaikoli nian tanba kompañia sei halo hela servisu ba implementasaun drainajen.
“Ha’u mós hakarak informa kona-ba ami-nia ezekusaun OJE foin atinje 13%, nune’e hein trimestre daruak mak imi foti de’it asuntu ne’e tanba foin mak ezekuta ne’e,” nia hateten.
Jornalista : Alexandra da Costa
Editór : Cancio Ximenes
