OEKUSI, 27 Abríl 2026 (TATOLI) – Koordenadór Zona Ekonomia Espesiál Dezenvolvimentu Oekusi Ambeno (ZEEDOA), Herculano de Sousa rekomenda ba Governu Sentrál atu halo klarifikasaun kona-ba ezonerasaun no nomeasaun estrutura iha Rejiaun Administrativa Espesiál Oekusi Ambeno (RAEOA) la inklui ZEEDOA tanba maka kria rasik ZEEDOA atu eziste iha Oekusi.
Notísia relevante:Herculano Sousa ‘dúvida’ Governu ezonera estrutura RAEOA la inklui ZEEDOA
Tuir nia, antes ne’e, Koordenadór ZEEDOA hetan nomeiasaun hamutuk ho estrutura RAEOA husi Konsellu-Ministru, bazeia ba Dekretu-lei númeru 1/2026, nu’udar tranzitóriu durante fulan hitu, hahú husi fulan-Setembru 2025 to’o 31 Marsu 2026.
Maibé hafoin Governu hasai tan rezolusaun foun, hodi ezonera estrutura tranzitória no nomea hikas estrutura definitiva la mensiona ona ZEEDOA iha lista ezonerasaun no nomeiasaun foun.
“Desizaun ne’e ita hotu la espera. Ha’u sente konfuzaun, ha’u la’ós atu defende ha’u-nia kargu, tanba ha’u mai Oekusi la’ós mai buka osan, maibé tanba ha’u ne’e Oekusi-oan, ha’u hakarak kontribui, tanba Governu rasik mak kria ZEEDOA ne’e, no ha’u hetan nomeasaun liuhusi rezolusaun Governu. Ha’u-nia kontratu mós Primeiru-Ministru mak asina iha Fevereiru 2024, maibé, foin daudaun Governu halo ezonerasaun ha’u-nia naran laiha fali, ida-ne’e mak to’o agora ha’u lahatene,” nia hateten ba jornalista sira iha Oekusi, ohin.
Notísia relevante:http://Herkolano Souza prioriza asuntu tolu durante lidera ZEEDOA iha Oekusi
Nia afirma, “Governu mak kria ZEEDOA no Governu rasik mak oho fali ZEEDOA, ida-ne’e hanesan tristeza ida, ha’u lahatene Governu Sentrál mak ansi liu ka ou la sente importante ba Oekusi tan ne’e mak ha’u pesoalmente konfuzaun, tanba ofisialmente tuir lei ne’e, ha’u seidauk tuun tanba ha’u-nia naran la hakerek iha lista ezonerasaun no nomeisaun foun”.
“Tanba ne’e ha’u husu ba Governu Sentrál atu haree, tanba ha’u sa’e ho rezolusaun tuun mós tenke iha baze, ne’e la’ós tanba ha’u Herculano de’it, ba sé de’it, foti ema ho rezolusaun tuun mós tenke iha rezolusaun, tanba ha’u la’ós funsionáriu públiku maibé nomeasaun polítika, atu hatuun tenke ho baze ida, ne’e la’ós tanba ha’u maibé funsaun Koordenadór ZEEDOA ne’e, Governu rasik mak kria, atu halakon mós tenke tau iha legál ne’e,” nia énfaze.
Notísia relevante:PM Xanana nomea Régio da Cruz sai Prezidente Autoridade RAEOA
Jornalista: Abílio Elo Nini
Editór: Rafael Ximenes de A. Belo
