DILI, 28 Abríl 2026 (TATOLI)—Vise-Reitór Universidade Nasionál Timor Lorosa’e (UNTL) ba Asuntu Akadémiku, Câncio Monteiro informa dadus ofisiál ikus hatudu estudante finalista 1.461 mak sei partisipa iha graduasaun ba da-XXXIV iha 2026.
“Ita sei halo graduasaun ba finalista hamutuk 1.461 iha loron 25 ho 26 Juñu tinan-ne’e. Dadus ajusta hotu ona no daudaun ne’e iha hela prosesu verifikasaun diploma provizória graduadu sira-nian no sira mós daudaun ne’e halo verifikasaun ba sira-nia dokumentu hanesan naran, data moris inklui asentu sira-ne’e iha Kampus Sentrál UNTL,” Câncio dehan ba jornalista sira iha Fundasaun Oriente, Tersa ne’e.
Vise-Reitór ne’e dehan ida-ne’e data tentativa no fatin ne’ebé UNTL deside mak Jináziu Dili, Kaikoli. Ida-ne’e hotu mak bele submete ba Ministériu Ensinu Superiór, Siénsia no Kultura hodi prosesa no hetan aprovasaun hodi pablika iha Jornál Repúblika, depoiz bele realiza serimónia solene.
“Iha prosesu verifikasaun finál iha Diresaun Nasionál Atendimentu Akadémiku (DNAA), identifika kandidatu 1.461 ne’ebé kompleta rekizitu administrativu hotu. Kandidatu balun la konsege finaliza rejistu to’o prazu taka. Nune’e, númeru ida-ne’e sai hanesan dadus finál ba preparasaun graduasaun,” Vise-Reitór informa.
Husi totál 1.461, programa Baixarelatu no Lisensiatura hamutuk na’in-1.410 kompostu husi Faculdade de Agricultura (71), Faculdade de Engenharia, Ciência e Tecnologia (150), Faculdade de Educação e Humanidades (370), Faculdade de Medicina e Ciências da Saúde (448), Faculdade de Economia e Gestão (135), Faculdade de Direito (41), Faculdade de Ciências Sociais e Políticas (158), Faculdade de Filosofia e Ciências Humanas (8), Faculdade de Ciências Exatas e Naturais (7), no Faculdade de Turismo, Artes, Indústrias Criativas e Culturais (22).
Ba programa Pós-Graduação no Mestradu, totál finalista hamutuk (51), ne’ebé kompostu husi: Pós-Graduação em Direito, Especialidade de Direito Público (1), Pós-Graduação em Direito (5), Pós-Graduação em Medicina Tropical e Saúde Comunitária (14);
Ba programa Mestradu, área hanesan Mestradu em Engenharia iha ualu (8), Mestradu em Ensino de Português no Contexto de Timor-Leste (8), Mestradu em Direito (3), Mestradu em Estudos da Paz e do Conflito (2), Mestradu em Desenvolvimento Comunitário (2), no Mestradu em Educação — Especialidade em Línguas e Literatura (5), Formação de Professores (1) no Movimentos Sociais (2).
Jornalista: Osória Marques
Editór: Xisto Freitas da Piedade
