DILI, 29 Abríl 2026 (TATOLI)—Sekretáriu Estadu Formasaun Profisionál no Empregu (SEFOPE) hamutuk ho Konsellu Nasionál Traballu (CNT, sigla portugés) finaliza ona revizaun lei kona-ba saláriu mínimu ba traballadór sira ho hein diskusaun iha reuniaun Konsellu Ministru (KM).
Notísia Relevante:
Sekretáriu Estadu Formasaun Profisionál no Empregu, Rogério Araújo Mendonça, hateten husi parte SEFOPE no Sentru Nasionál Traballu finaliza ona revizaun ba lei saláriu mínimu ho montante husi 115 hasa’e ba $154.
Lei ne’e submete ona ba MKAE no Gabinete Primeiru-Ministru inklui Prezidente Konsellu Ministru no fiar katak iha semana oin bele halo ona diskute ba asuntu ida-ne’e iha reuniaun konsellu ministru.
“Montante saláriu ne’ebé aplika mak husi $115 hasa’e ba $154, maibé montante seidauk fixu tanba to’o iha reuniaun Konsellu Minsitru sei halo diskusaun atu mantein ho proposta ka hasa’e tan, no bainhria proposta ne’e hetan aprovasaun sira sei implementa iha tinan 2026,” Sekretáriu Estadu Formasaun Profisionál no Empregu, Rogério Araújo Mendonça, informa ba jornalista sira iha CCD, Kaikoli, ohin.
Bia informa, iha tinan 2025, SEFOPE hamutuk ho Konsellu Nasionál Traballu (CNT) lori ona ezbosu proposta saláriu mínimu ba Konsellu Ministru maibé hetan rekomendasaun ne’ebé presiza hadi’a.
“Entaun, ami tenke hadi’a fila-fali pontu balun ne’ebé sita husi Konsellu Ministru, ne’ebé SEFOPE presiza halo konsultasaun ho MAKLAN hodi haree ba pensaun veteranu, tanba iha isu balun hateten katak bainhira ita hasa’e saláriu ba traballadór sei fó implikasaun ba iha pensaun veteranu,” nia dehan.
Nia deklara, lei ida ba pensaun veteranu ne’e ketak ida no lei ba traballadór mós ketak, nune’e sira-nia parte halo ona konsultasaun ho MAKLAN no sira afirma katak laiha implikasaun bainhira saláriu mínimu ne’e aumenta.
“Entaun, ami halo ona konsultasaun ho veteranu no tempu hanesan ami mós halo konsultasaun ho Ministériu Finansa liuliu ba iha estatístika ho makro ekonomia ho objetivu bele halo analiza ba inflasaun iha rai-laran. Maibé parte MF fó resposta katak saláriu mínimu merese hasa’e husi montante $115 ba $154,” nia dehan.
Enkuantu bainhira proposta ne’e aprova, Governu sei halo sensibilizasaun ba públiku liuliu empregadór sira atu implementa saláriu ba traballadór sira tuir lei ne’ebé define ona.
Entretantu, kona-ba lei traballu doméstika nian, Governante ne’e labele pronúnsia lai tanba foin daudaun ne’e ekipa sira ba halo konsultasaun iha Parlamentu Nasionál, no faze tuir mai mak SEFOPE ho sindikatu sira tuur hamutuk ho Sekretária estadu Igualdade (SEI) mak halo diskusaun ramata ona, hafoin anúnsia ba públiku.
Jornalista : Alexandra da Costa
Editór : Cancio Ximenes
