DILI, 29 Abríl 2026 (TATOLI)—Governu Konstitusionál da-sia (IX) liuhusi Sekretária Estadu Formasaun Profisionál no Empregu (SEFOPE) realiza atividade doasaun raan no bazár baratu iha ámbitu komemorasaun loron mundiál ba traballadór iha Timor-Leste ho tema “Hametin diálogu sosiál liuhusi negosiasaun koletiva hodi promove traballu dignu iha servisu fatin”.
Sekretáriu Estadu Formasaun Profisionál no Empregu, Rogério Araújo Mendonça, hateten SEFOPE hamutuk ho Konsellu Nasionál Traballu, kada tinan sempre komemora loron mundiál traballadór.
“Tanba hanesan ita hatene katak traballadór sira mak sai erói ba dezenvolvimentu ekonomia iha Timor-Leste,” Sekretáriu Estadu Formasaun Profisionál no Empregu, Rogério Araújo Mendonça, ba jornalista sira iha CCD, Kaikoli, ohin.
Governante ne’e dehan, atividade ba loron ohin ne;e sira foka liu ba pontu importante rua mak doasaun raan no bazár baratu hodi promove traballadór sira liuliu sira-ne’ebé hetan rendimentu saláriu mínimu $115, nune’e oportunidade ne’e bele fó biban ba sira asesu merkadu ho presu ne’ebé baratu.
“Governu nafatin esforsu no iha kompromisu atu hasa’e saláriu ba traballadór sira, tanba ne’e ami halo hotu ona revizaun ba lei saláriu mínimu. Fiar katak iha reuniaun Konsellu Ministru tuir mai bele debate ona kona-ba asuntu ida-ne’e,” nia dehan.
Entretantu, atividade doasaun raan iha voluntáriu na’in-80 mak oferese sira-nia raan no bazár baratu nian ne’e partisipa husi empreza hamutuk 17 mak faan sira-nia produtu durante loron rua iha Sentru Konvensaun Dili (CCD), Kaikoli.
Notísia Relevante: SEFOPE-CNT finaliza revizaun lei saláriu mínimu husi $115 hasa’e ba $154
Jornalista : Alexandra da Costa
Editór : Cancio Ximenes
