DILI, 30 Abríl 2026 (TATOLI)—Governu liuhusi reuniaun Konsellu Ministru, kinta ne’e, aprova proposta kona-ba transferénsia públika ho montante millaun $41 ba TIMOR GAP, E.P, hodi halo investimentu ba Greater Sunrise no bloku esplorasaun mina no gás nian, ne’ebé aprezenta direta husi Ministru Petróleu no Rekursu Minerál, Francisco da Costa Monteiro.
Ministru Petróleu no Rekursu Minerál, Francisco da Costa Monteiro, hateten ohin lori proposta ida kona-ba transferénsia públika ho montante millaun $41 ba Timor Gap, atu hetan aprovasaun husi Konsellu Ministru.
“Tanba tuir lei orsamentu nian katak buat hotu ne’ebé mak atu transfere ba entidade ruma tenke iha rekoñesimentu no aprovasaun husi Konsellu Ministru,” nia informa ba jornlista sira iha Palásiu Governu.
Nia hatutan, osan husi transferénsia públika ne’e ho objetivu atu apoiu investimentu sira-ne’ebé Timor Gap presiza halo liuliu sira-nia partisipasaun iha Greater Sunrise no futuramentu ba bloku ne’ebé sira halo esplorasaun.
Enkuantu despeza ne’e mai husi dotasaun orsamentál hosi Ministériu Petróleu no Rekursu Minerál, iha ámbitu Programa A17 neʼebé ho objetivu atu “Dezenvolve Polítika no Prátika Di’ak iha Indústria hodi Garante Partisipasaun Másima Timoroan sira-nian iha Atividade Setór ne’e nian”.
Jornalista : Alexandra da Costa
Editór : Cancio Ximenes
